Adiós de Jimmy al U.C. Ceares
Dempués de siete temporaes lluciendo la camiseta teyera, el nuestru capitán Rubén Martínez Reguera “JIMMY” dexa’l club.
La presente tuvo siendo una temporada dura pa Jimmy, estrada de mancadures nun futbolista nel que nun yeren vezu, y polo que solo pudo tar disponible durante un terciu de la lliga. Dempués de pensalo muncho, a los 38 años Jimmy diz adiós al Ciares, anque tovía nun anuncia la retirada: “tengo ganes de siguir xugando y compitiendo, pero a menos nivel del que esixe güei en día’l Ciares. El mio físicu va cada vegada a menos y el Ciares va a más”. Polo que si nun vuelven les mancadures y se caltienen les sos ganes de fútbol, la prósima temporada Jimmy xugará en categoríes inferiores.
Jimmy dexa La Cruz con munchos fitos baxo’l brazu: máximu goliador na historia del U.C. Ciares en Tercera División, tres vegaees ganador del Troféu George Best al meyor xugador de la temporada, tres vegaes pichichi ciarista, capitán del históricu Ciares del playoff… y en definitiva un d’esos xugadores que marquen una época nun club, pasando nunos años de pelear pola permanencia a raspiar l’ascensu a Segunda B, siempre siendo un de los destacaos.
El Domingu a les 17:00 recibimos al Astur C.F., cola necesidá de ganar pa clasificanos pa la Copa Federación. Esi va ser l’últimu partíu de Jimmy lluciendo la nuestra camiseta y el nuestru brazalete, polo que vamos despidir al nuestru capitán como merez.
[Recordamos que l’alcuentru ye Día del Acompañante, polo que cada soci@ va poder sacar les entraes que quiera pa los sos acompañantes, al preciu de 5€ cada una.]