[Andés 1 – 1 Ceares] Un puntu nun campu per duru

Puntu sufiertu en San Pedro. El terrén de xuegu daqué irregular condicionó’l xuegu de dambos equipos, viéndose un fútbol bien directo con predominiu de segundes xugaes. Adelantróse’l Andés CF, que na segunda parte quedose con un home menos. El Ceares empató nel ‘80 y nos minutos finales zarró a los locales na so área.

Cuando na xornada 10 de lliga un equipu solo perdió un partíu en casa, ta claro que visitar esi campu nun ye fácil. El Andés atópase na parte baxa de la tabla bordiando los puestos de descensu, entá nun puntuó fora de casa, pero antes del nuesu partíu tenía una marca en casa de dos victories, dos empates y una derrota. Por enforma que visitáramos a un acabante xubir, el respetu yera máximu. Nos prolegómenos del alcuentru realizose la presentación de los equipos de fútbol base del Andés CF, lo cual fixo que la entrada del partíu fuera importante, de dellos cientos de persones, ente los que de xacíu había decenes d’aficionaos ciaristas.

L’equipu nun s’atopaba cómodu dende l’empiezu del partíu. El terrén de xuegu, daqué irregular, enzancaba l’habitual xuegu de toque ciarista. Los balones llargos apoderaben el partíu, y les defenses ganaben la partida de cutio, de manera qu’apenes había ocasiones de gol y los porteros yeren un espectadores más. Nel minutu 20 el Andés dispara dende fora de la área pero Pablo atrapa ensin nengún problema. Primer disparu a puerta del partíu. Poco dempués Fonso Bellón saca de banda nel estremu derechu del ataque xixonés, Ponte peina, y Juan Carlos entrando dende tras cabecia a espetaperru pero Carrera estena con bonos reflexos. Nel minutu 32, balón que cuelga’l Andés a la área, prodúcense una serie de refugues, y la pelota queda muerta a los pies de Pablín, que remata fuerte enriba ensin que Pablo Díez pueda facer nada. 1-0 que llega siguiendo la tónica del partíu: balón llargu y segunda xugada. D’ende al descansu, nin locales nin visitantes llograron averase con peligru a la portería rival.

Na segunda parte’l xuegu nun varió. Muncha llucha, defenses series y balones llargos. Adulces el Ceares diba faciéndose col partíu. Nel ’50 Pablo Martínez, tres una bona combinación, recibe’l balón de cara na frontera, dispara, pero’l so intentu váse-y alto. De siguío Pelayo Torre, daqué escorau, sácase un disparu qu’a puntu ta de sosprender a Carrera pero va raspiándose el llargueru. Nel ’60 Nacho Cabo mueve ficha: Rubén Montequín y Borja Argüelles entren sustituyendo a Ponte y Meana. Nel ’68, Fonso Bellón llánzase a la disputa d’un balón, produzse un choque con Sergi, el xugador local revuélvese y afrella al llateral ciarista. Cartulina colorada pa Sergi y el Andés quédase con un xugador menos. Entós l’emburrie visitante amontóse entá ye más. Rubén Montequín recibe’l balón botando na frontera, y ensin pensa-y lo suelta una potente volea que sale bien centrada y atrapa Carrera. L’equipu local malapenes podía salir del so campu, anque a el xixoneses costábayos rematar les xugaes. Nel ’80 Pablo Martínez dispara dende la frontera, y el balón cólase como un obus pela escuadra de Carrera roblando l’empate. D’ende a la fin l’asediu ye total. Nel ’89 Fran Do Santos sustitúi a Pelayo Torre. El Andés aguantaba na so área con un home menos y el Ceares atacaba aguiyonáu pol gol del empate. Sicasí, nun hubo tiempu pa más, y l’árbitru pitó’l final del alcuentru col 1-1 nel marcador.

Puntu importante nun campu bien duru y ante un equipu con un gran rigor defensivu. Sumamos 21 puntos, 14 percima del descensu, y asitiamos en 3ª posición, empataos a puntos col Llangréu qu’ocupa la segunda plaza.

Próximu partíu: Miércoles a les 15:45 en La Cruz, UC Ceares – Universidá d’Uviéu, con entrada d’acompañante de sociu a solo 5€.

Recordamos que’l Domingu tamién hai partíu: a les 15:45 en Santa Cruz, derbi de la ciudá ante’l Xixón Industrial, con entraes pa socios del UC Ceares a 5€.