[Andés 4-2 Ciares] El Ciares cae na troncada
Segunda derrota de la temporada pal equipu de Miguelín, nel partíu que deseyaba’l Andés, pero tarrecíen los futbolistes teyeros.
Basta echar un güeyu a l’alliniación del Ciares pa dase cuenta de que nun yera un partíu normal. La baxa de Juan Carlos cubríala un Rigo, habitual defensa, acompañando a Prendes. Dos xugadores de contención como pivoses.
Andés 4 – 2 Ciares
Andés: Diego; Álvaro (Roberto 78′), Dieguito, Borja, Cafú, Pablo, Cancio (Gayol 85′), Modesto, Facundo, Rubén y Jairo (David 86′)
Ciares: Kike; Fonso Bellón (Bryan 66′), Lozano, Beni, Aitor, Rigo (Polo 72′), Prendes, Pablo Martínez (Chery 72′), Jimmy, Jorge Vázquez y Ponte.
Goles:
1-0: Pablo 11′
1-1: Pablo Martínez 15′
1-2: Polo 33′
2-2: Modesto 37′
3-2: Modesto 65′
4-2: Cancio 67′
Árbitru: Fernández Fernández, nun amosó tarxetes.
Incidencies: Alcuentru o correspondiente a la xornada ventiavu primer de la Tercer División d’Asturies celebráu nel campu de San Pedro ante unos 150 espectadores, trenta d’ellos ciaristas. Terrén de xuegu impracticable y mientres tol partíu azotó una envernada tarrecible.
Y ye que si había un mal día pa xugar en Andés, esi yera güei. San Pedro ye d’esos campos que ye meyor visitar en primavera. En dómina d’agües esi campu vuélvese impracticable. Quiciabes el peor campu del añu, nel peor día del añu. Empezamos bien.
Mientres noventa minutos vio toa una colección de punterazos, frenaes, coldaes, disputes, saltos de cabeza. Un deporte bien paecíu al fútbol, pero nun yera fútbol.
Les escases dimensiones del campu faciliten los balones a la área, y asina llegaron los dos primeros goles. Los dos de penalti, los dos por emburriones. El primeru a favor de los locales. Kike aguantaba pa tirase y raspiaba el balón, pero adelantrábase’l Andés.
Nel segundu, darréu dempués del primeru, Pablo Martínez forzó dalgún qu’otru By Pass a los aficionaos visitantes al tiralo pembaxo, pero l’empate xubía al marcador.
Yeren los meyores minutos del Ciares. A pesar de nun ser el so fútbol, nun dexaben al Andés crear peligru. Nun había dominador, non podía apoderase el partíu. Pero de la única manera en qu’el Andés podía ganar al Ciares, nun yeren capaces de crear peligru.
Ello ye que Ponte adelantraba al Ciares con un latigazu dende la frontera de la área qu’entraba pegada al palu derechu defendíu por Diego. Y pocu dempués a puntu ta de sentenciar, pero tres una gran xugada, controlando de llombu a portería en mediu campu y llantándose ante’l porteru, nun precisaba’l so disparu y díbase alto.
Pero pocu antes del descansu Rigo estenaba a córner. Salía Kike a estenar pero’l balón faía un estrañu nel aire y quedábase-y enredáu so les piernes. Modestu llegaba y emburriaba a gol. Empate de nuevu.
La segunda parte empezaba de nuevu col Ciares dominante. Primeru gol anuláu a Ponte namás empezar. Na segunda, gran xugada per banda derecha, Ponte busca a Jorge Vázquez, que la dexa de cara a Pablo Martínez, pero’l so disparu dende’l puntu de penalti sále-y bien centráu y atrapa Diego.
Pero entós, llegó lo imprevisible. El vientu camudó de dirección.
Kike nun podía nin sacar, el balón nun pasaba del centru del campu. El Ciares yá nun podía salir. El Andés empezó a apertar, apertó enforma. Primero, el tercer gol, nuna falta pasada que de nuevu Modestu emburria na llínea.
Na siguiente xugada, Jairo díbase de toos, y Cancio emburriaba sobre la llínea’l balón y remataba el partíu.
Quedaben veinticinco minutos per delantre, pero yera imposible. Namás un remate de cabeza de Ponte punxo n’apiertos a los locales.
Vanse tres punto, pero ye namás la segunda derrota de la temporada. Agora espera’l Llanes.