[8 de Marzu] Escuela Mista de Fútbol: semando igualdá

Escuela Mixta de Fútbol

La Escuela Mista de Fútbol, formada pol Xixón Fútbol Femenín y l’U.C. Ceares, fai que neños y neñes compartan el so deporte favoritu, normalizando dende pequeñxs la presencia femenina nel fútbol.

Escuela Mixta de Fútbol

Anguaño, l’interés pol fútbol nun entiende de xéneros, y más o menos la metá d’aficionaos a esti deporte son homes y la metá muyeres. Sicasí, a la de practicalo, el porcentaxe de decanta infinitamente pal lláu los homes. ¿Cómo puede ser que si a les muyeres-yos presta’l fútbol tanto como a los homes, nun lo practiquen? Paez claro que la sociedá entá pon barreres y afala a les muyeres a realizar otres actividaes, porque considera qu’hai coses que solo son “d’homes”. Y como nós tampoco escapamos al patriarcáu, anque nos avergoñe confesalo, el fútbol femenín y polo xeneral la presencia de la muyer nel balompie yéranos totalmente desconocida hasta entós. A pesar de tener como club bones pallabres ya intenciones al rodiu la igualdá de xéneru y la participación de les muyeres nel fútbol, na práctica apenes consiguiéramos avanzar. Por suerte va dos años conocimos al Xixón Fútbol Femenín, y ende camudó tou.

Al conocer a estes compañeres de viaxe y les sos circunstancies y problemátiques, decidimos revisanos y faer propósitu d’enmienda. Por ello empezamos a promocionar lo máximo posible, y na práctica, el fútbol femenín, y sobremanera visibilizar esa la presencia de la muyer nel fútbol. Y pa ello l’U.C. Ceares y Xixón Fútbol Femenín decidimos construyir daqué conxuntu, la Escuela Mista de Fútbol, una estructura non solo pa promocionar el fútbol femenín, si non tamién col enfotu de que fora una grana d’igualdá.

Y asina, si l’U.C. Ceares nos sos entamos, con un fútbol base en teoría mistu, podía cuntar colos deos d’una mano les sos neñes futbolistes, tres l’alcuerdu col Xixón Fútbol Femenino y la creación de la Escuela Mista de Fútbol, nel so primer añu la estructura pasó a acoyer a 28 neñes (un 20% del total de peques). La presente temporada, la segunda de la Escuela Mista de Fútbol, Xixón Fútbol Femenín y U.C. Ceares creemos nuevos equipos, tanto femeninos como mistos, cuntando nes nueses files con un total de 69 neñes (un 30% del total). Entá lloñe d’esi 50% que sedría lo normal, el camín entamáu va dando resultancies.

Pero nun solo falamos de númberos. Nel aspeutu cualitativu, percibimos un cambéu claru na masa social y nel fútbol base del U.C. Ceares: el fútbol xugáu por muyeres xenera munchu más interés del que lo facía va unos años, y yá se percibe con total normalidá. Ye especialmente interesante nel casu del fútbol base, onde la convivencia ente neños y neñes, tantu n’equipos, como compartiendo campu, confiamos en que sía clave pa normalizar la presencia femenina nel fútbol, ensin qu’ello traiga comentarios machistes, nin discriminaciones de cualquier tipu. Y por qué non, qu’esa igualdá efectiva aprendía na práctica dende pequenxs, pueda estendese al restu d’ámbitos de la vida onde la muyer sigue siendo discriminada con respectu al home.

Dalgún va preguntanos: ¿y la presencia femenina na grada, qúe? ¿Y por qué nun hai muyeres nos puestos directivos? ¿Y nos banquillos? ¿Y les actitúes machistes? ¿Y la ausencia d’animación nel fútbol femenín? La respuesta ta en manos de toes: tenemos munchos deberes pal próximu 8 de Marzu.

Deporte Asturiano
Xixón Deporte
Programa Impulso 23

Ellaces d'interés
Enlaces de interés


Contautu
Contacto


Por TLF: L-V 16:30 a 21:00
La Cruz: X de 17:00 a 20:30

Tienda: +34 636 517 376
Administración: +34 637 521 674

D. Deportivo Masculino: 646 862 239
D. Deportivo Femenino: 684 646 699
F. Base: 627 534 266
F. Sala: 626 803 590

Copyright ©2018 Unión Club Ceares

0
    0
    Carrito
    Tu carrito está vacíoVolver a la tienda