L’equipu de Miguelín cai un puestu na so particular llucha por algamar la sesta plaza, que saldrá d’ente nós y el Llanes.

Ye perdifícil analizar esos partidos nos que tan llueu se condicionen por un gol. Nesti casu, apenes habíen pasáu 10 minutos cuandu una mala cesión de Beni a Kike yera atayada por Jose Mari, que resolvía con muncha clas picándo-y el balón penriba’l porteru visitante. Yera’l 1-0.

Y ye que l’Avilés B atopaba mui necesitáu de puntos. El filial encaraba esti partido en plena caída llibre, tres una rellumante primera vuelta de la mano del ex ciarista Nacho Cabo, la crisis institucional afeutaba demasiáu a los mozos xugaores avilesinos.

Miguelín repitía once, los mesmos once que la cabera xornada metíen al Xijón Industrial nun líu. alliniaciónes y convocatories mui condicionaes poles baxes, nuna temporada mui dura poles mancadures.

Aparte del gol, el restu del primer tiempu foi visitante. Más llegaes y más ocasiones palos teyeros, que buscaben l’empate. Beni tuvo la primera, nun remate de córner. Jimmy, en plena racha, la segunda. Controló pola manzorga y fue buscandu sitiu hasta que pudo disparar, pero’l balón salio raspiando’l palu.

Dos buenes llegaes pela banda de Polo, pisando área y sacando’l centru, daben la sensación de que los de Miguelín nun se diben dir de vacíu del campu avilesin.

Al descansu, Beni dexaba’l prau dexando-y el puestu a Jorge Vázquez. Aitor retrasaba la so posición al centru la defensa. El dibuxu calteniase, con 4 defenses y 2 xugaores per dellante, pero nesti casu los dos con un caráuter más distribuidor.

El segundu tiempu ensin embargu entamaba con menos ritmu que’l primeru. Dambos equipos paecíen crear menos peligru ante’l marcu contrariu. Los minutos pasaben nuna especie de griesca fría. Pero rompióse a los 60 minutos, nun inocente e involuntariu penalti, que yera transformáu tres engañar a Kike nel lanzamientu. El partido poníase cuesta arriba.

Cris Alonso y Ponte tratarón de da-y chisca al partido. Polo cayó a banda drecha, y Cris facialo dende la manzorga. Dos avisos dierón llugar al gol. Jimmy conduz pol centru, con ofrecimientos de pase pa Cris y pa Polo. Ensin embargu, el capitán aguanta un pocu más y dexa a Ponte completamente solu dellantre del porteru, resolviendo con muncha clas y tranquilidá al primer palu.

Los caberos 10 minutos de partido forón de llocura. Lozano colocáu de 9, el Ciares zarrando con 2 homes, con Kike adelantáu. Los visitantes intentadolo too, los llocales escontra atacaben. Caún con sos armes. Curiosamente, dambos equipos tratarón de marcar dende mediu campu, por parte del Ciares tou un habitual neses artes, Jorge Vázquez.

Al final los puntos quedarón n’Aviles. Agora toca’l Cuadonga, y toca referéndum pa esbillar si l’añu que vien falamos del Ceares o del Ciares.

Y a lluchar pol sestu puestu, eso por descontáu.