[Candás 0 – Ceares 1] Victoria a la heroica

Cuando tou apuntaba a un empate a cero, primero’l Candás falló un penalti nel ’83, y dempués Ponte anotó’l gol de la victoria nel tiempu de descuentu. Victoria épica y gran comunión ente equipu y afición. El Ceares algama la segunda posición, sacando yá 12 puntos a la parte de descensu.

Tres la dura derrota en Villaviciosa, l’afición ciarista volvió viaxar, esta vegada a Candás, p’animar a los suyos. Unos cien siguidores diéronse cita en La Mata pa esfrutar d’una tarde de fútbol col so equipu, deseyando ver si los de Nacho Cabo podíen siguir col gran xuegu que-yos ta caracterizando, o siquier, cola entrega y combatividad, daqué que nunca falta nes files ciaristas.

El partíu empezó col Ceares tratando de faese col control del balón, pero la presión candasina fízolo bien complicáu. Pasaben los minutos ensin apenes ocasiones. La primera túvola Jimmy, pero’l so disparu dende la frontera díbase alto. Darréu, combinación ente’l mesmu capitán que dexa de cara dientro de la área pa Pablo Martínez, pero’l so peligrosu disparu escapábase percima del llargueru. Primer parte ensin más hestoria y descansu en La Mata.

Col empiezu de la segunda parte’l partíu nun ganó n’emoción. Nacho Cabo trató de camudar l’aldu del partíu, primero dando entrada a Juan Carlos por Rubo nel ’58, y pocu dempués con Pelayo Torre en llugar de Pablo Martínez. Sicasí, malapenes una llegada candasina con disparu esviáu de Miguel Blanco foi tol bagaxe hasta’l ‘80. A partir d’esi minutu empezó’l partíu. Celoriu centra’l balón a la área, y como si repitiera la xugada que nos supunxo la derrota en Villaviciosa, el balón cute na mano de Lozano y l’árbitru señala’l puntu de penalti. Queipo asitia’l balón, dispara, pero’l balón vase bien esviáu de la portería. Sonadiella na grada ciarista que yá vía la pantasma de Les Caleyes sobrevolando la zona. Paez que la xugada sirvió de sacalliñu pa el xixoneses. Nel ’87 Borja Argüelles lleva un contraataque peligrosu, y en conduciendo’l balón hasta la frontera, ye baltáu. Borja Noval, que venía de marcar la selmana pasada de penalti, dispara’l golpe francu, pero Nacho atrapa seguru. Nel ’87 Nacho Cabo quema les naves, y Ponte entra en llugar de Jimmy. En tiempu de descuentu, nel ’93, xugada trenzada qu’acaba nes botes de Pichón en banda esquierda, quien al altor de la área pon un gran centru cola pierna maniega, y Álvaro Ponte adelantrase al so marcador pa rematar de primeres a la rede. Carreres dende’l banquín, abrazos colectivos cola grada, y llocura xeneralizada. Nun había tiempu pa más, la estocada de Ponte era definitiva, y l’árbitru pitaba’l final del alcuentru. Nun sería’l partíu más brillosu de la temporada, pero l’equipu demostró que podrá fallase en munches coses, pero nunca n’entrega y fe.

Próximu partíu: Domingu a les 16:45 en La Cruz, U.C. Ceares – R. Avilés ‘B’.