Un solíu gol de Marcos decide un duru alcuentru ente gallinos col Tuilla. Los de Miguelín van pasar una selmana más en puestu de play-off.

[youtube]https://www.youtube.com/watch?v=ItDVdW_w1dY[/youtube]

Pocu a pocu los los alcuentros ente Ceares y Tuilla tan convirtiéndose en pequeños clásicos, en partíos disputaos, duros, igualaos. L’añu pasáu recordamos la remontada del Ceares nel so campu, que pasaba del 0-3 al 3-3, con golazu de bandera de Beni nel últimu instante. Va dos, los aficionaos tovía recuerden el 3-2 n’El Candín, con 3 goles anulaos pa los visitantes que asistíen atónitos al arbitraxe.

Sin embargu esti añu el partíu tuvo un tempranu desenlace, ya que’l marcador definióse nos primeros instantes. Marcos Iglesias escapa pela banda derecha, plántase ente’l porteru, intenta regatealu pa contra dientro pero rechaza Jose. El balón cae-y a Cris, que dispara, y tres dos rebotes, l’últimu en Marcos, cuélase na portería de Los Pericones. El delanteru xixonés mantien el so idiliu col gol, al convertir el cuartu en cinco partidos.

A partir d’ehí, el Ceares púsose a facer lo que ta demostrando que meyor fae. Cede’l balón al rival, y entama’l so partíu. Sin sufrir demasiáu, sin conceder ocasiones. Fízolo col Gijón Industrial, repitiólo col Oviedo B, y agora yeml Tuilla quien lo sufre nes sos carnes.

Dende esi gol de Marcos nel minutu 2, la presión recaía nel conxunto arlequináu. Sin embargu, los de Pulgar, mui mermaos poles baxes, non fueron a poner en demasiaos apuros a un Davo que continúa col so inmaculáu iniciu de lliga.

De fecho, durante’l restu de los primeros 45, los equipos repartieron les ocasiones. Pal Ceares, Ponte. Volvía al 11, a formar pareya otra vez con Marcos Iglesias. Ambos se plantaron ente Jose, pero Ponte intentaba sorprender rematando de cabeza cuando paecía que diba a controlar. Pal Tuilla, estratexa. Falta na frontal pal perfil d’un zurdu. Cuando paez que va disparar, filtren el balón pero ataya Davo el mano a mano.

Pala segunda parte, repetimos guión. Los de Pulgar busquen tener el mandu del partíu. Pero ye un mandu artificial, ya que ye’l Ceares quien-y lu dexa. Amás, el xuegu visitante tampocu pon n’aprietos, con más fuerza que fútbol. Hugo y Aitor, dos mediocentros con marcáu carácter de contención imponen la do llei y caltienen ordenaos a los brickers.

Col final, el Ceares saca sobresaliente nel entamu de lliga como llocal, tras tres victories n’otros tantos alcuentros. 12 puntos de 15 posibles, tras habese enfrentáu yá a 2 equipos que la temporada pasada disputaren play-off considérase un bagaxe de lo más positivu.

Agora espera otru de los gallinos de la lliga, el Real Avilés. Buena piedra de toque y interesante partíu. De momentu, en Copa Federación, dos de dos pa ellos. Plantéase guerra.