[Ciares 1-0 Águilas] Águila que vuela, pa la cazuela
El Ciares sigue demostrando que’l dineru nun lo ye tou nel fútbol y esanicia al poderosu Águiles de la llucha pol ascensu a Segunda B
Nunca tanta xente allegara en tan altu númberu a La Cruz, y nunca tan ilusionada. Nunca families enteres traxéronse unes pizzes pa comer a mediudía nel campu y coyer sitiu. Nunca tanta xente espoleó cada acción y nunca tanta xente glayó’l gol que metía al Club Teyeru nel bombu de mañana.
Más de 1500 persones dieron cita nel Parque de los Pericones pa vivir l’emoción d’un alcuentru intensu, como’l de la ida. Onde un equipu con escasos recursos pero con grandes dosis d’ilusión, enfrentábase a unu que lu quintuplica en presupuestu, y que se vio en munches d’estes. Pero nel fútbol non yá gana’l que más tien.
Águilas 1 – 1 Ciares
Ciares: Kike, Fonso, Rigo, Borja Noval, Aitor Cañedo, Juan Carlos, Pichón, Pablo Martínez, Jimmy (Meana 92′), Pelayo Torre, Borja Argüelles (Ponte 87′)
Águilas: Javi Soto, Fran, Luna, Marco, Piñero, Emilio, Xavi, Méndez, Mara, Chiqui, Meca.
Goles: 1-0: Pablo Martínez 37′
Árbitru: Martín Pérez, del Colexu Cántabru. Amonestó a Pelayo Torre pol Ciares, y a Xavi polos visitantes. Expulsó por doble mariella a Luna nel minutu 91.
Incidencies: 1500 espectadores en La Cruz, nel partíu de vuelta de la primer ronda de play-off pol ascensu a Segunda B. Terren de xuegu impecable.
Deportivamente falando, el partíu empezó como la ida. El Águilas quería mandar, pero nun llegaben les ocasiones. El reló corría nel so contra. Buscaben a los estremos, pero Fonso y Aitor, escelentes güei, nun concedíen buecos pal centru.
Adulces foise faciendo col balón el Ciares. Sofitaos nun espectacular Pelayo Torre, que dio tou un recital de controles y amagos, l’equipu bricker salía de la cueva. Gol anuláu per fora de xuegu a Ginés Meca, y acabóse el Águilas.
Primero Borja Argüelles pide penalti tres una posible mano del defensa visitante. Pocos minutos dempués regatiaba a tolos que salíen al so pasu y provocaba la primer ocasión del partíu, estenando’l porteru a córner tres el so mano a mano. Pasquali Argüelles enchufábase al partíu.
Minutu 37 de la primer parte. Xugada per banda esquierda del Ciares. El balón cai-y a Pablo Martínez, que col interior del pie, y con tola clase del mundu, la enchufaba. Y cayíase la Cruz, lliteralmente.
Inda quedaba tiempu por que Borja Noval mandara una falta al llargueru. Los equipos dir al descansu, ante’l deliriu local.
Na segunda parte, la Águiles quixo empatar, pero más por emburrie que por xuegu. La única ocasión visitante llegó tres un llanzamientu de córner que’l trabáu central Marcu remataba fora.
Y los minutos pasaben.
Y la Cruz apertaba.
La tensión vivíase na grada más polo curtio de la resultancia que pol peligru aguileñu.
Borja Argüelles y Jimmy lleváronse les sos ovaciones…, y l’árbitru pitó’l final.
En siete díes vamos tener un nuevu capítulu. Mañana esperamos rival.
NOTA: Finalmente’l rival del sortéu foi l’equipu madrilanu Trival Valderas