[Ciares 1-1 Candás] Puntu positivu

Lozano salta ante los delanteros candasines, Ceares - Candás 13/14

Toda la actualidad del U.C. Ceares al día en Golaverage.com

Xugábense nel verde de La Cruz tres puntos importantes. Per un sitiu, el Ceares buscaba caltenese enriba y meter presión al líder Pravianu. Por otru, un Candás n’estáu d’emerxencia, en provisional puestu de descensu, por cuenta de la posición del Caudal na tabla de clasificación del Grupu I de Segunda B.

Lozano salta ante los delanteros candasines, Ceares - Candás 13/14
Lozano salta ante los delanteros candasines

Si daqué comentábase na previa, ye qu’el Candás nun xuega tan mal como marca la clasificación. Un equipu’l roxiblancu (güei negru), que fai bon fútbol. Sicasí nun casi nunca tien adeala nel marcador.

Empezaba bien el Ceares. Primero intentábalo Fonso Bellón, nun duru disparu dende’l llateral diestru que se diba cerca del palu curtiu. Poco dempués, tuvo Jimmy el gol. Balón en llongura que controla’l capitán, dribla a Nacho, pero péga-y taragañada cola maniega. El refugue cai-y a Rubo que la manda enriba.

Ciares 1 – 1 Candás

Ciares: Pablo Díez, Fonso Bellón, Lozano, Borja Noval, Óscar Ruiz (Aitor Cañedo 78′), Pablo Martínez (Ponte 78′), Pichón, Borja Argüelles, Jimmy, Pelayo Torre, Rubo (Juan Carlos 48′).

Candás: Nacho, Costales, Charly (Queipo 60′), Aitor, Celorio, Diego, César, Óscar (Berto 92′), Eric, Pablo, Álvaro (Radamés 86′).

Goles:
0-1: Álvaro 22′
1-1: Borja Noval 45′

Árbitru: Farto García. Discutíu. Amonestó a Fonso Bellón y Borja Argüelles pol Ciares. Y a Charly, Aitor, Álvaro y Pablo pol Candás. Expulsó por doble mariella a Eric nel minutu 82.

Incidencias: 350 espectadores en La Cruz. Terren de xuegu en condiciones irregulares.

El retruque púsolu Álvaro namás cinco minuto más tarde. Intenta cabeciar a espetaperru un balón dende banda esquierda pero nun l’engancha bien. Pablo resuelve.

A partir d’ende, supo dormir el partíu’l Candás. El Ceares nun combinaba como siempres, nun conectaba cola llínea de mediapuntes, y el conxuntu marañuelu paecía más cómodu.

Y llegó el gol visitante. De nuevu centru llateral, y de nuevu Álvaro cabeciaba, pero esta vegada impecablemente, y el balón colábase pegau al poste esquierdu de Pablo, que nun podía facer nada. Namás diben veintidós minutos, pero’l partíu poníase cuesta enriba nel marcador, y nel xuegu.

Trescurríen los minutos. Namás a balón paráu creaba peligru’l Ciares. Intentábalo Óscar Ruiz costantemente a pierna camudada, y dos plasmos llevaba’l cancerberu visitante. Pero’l partíu pintaba a la variante na quiniela.

Xustu antes del descansu, Charly daba vida a los locales. Balón que paecía con ventaya pa Nacho, pero’l central candasín cortaba cola mano. Penalti innecesariu, penalti claru. Borja Noval llanza a mediu altor, Borja Noval vuelve marcar. El Ciares métese nel partíu. El partíu empieza de cero.

Pero la segunda parte nun entama como s’esperaba. Apenes s’empecipiaba, Pablo facía’l paradón mañaneru nun mano a mano con Álvaro. El retruque poníalu Pablo Martínez n’otru disparu col esterior.

Pasaben los minutos. Pero’l Ciares nun creaba peligru. Nin siquier el cambéu de sistema, con un Juan Carlos que volvía al equipu, y con Borja Argüelles en punta, llograba llevar la molición a la área visitante. La parroquia local esperaba la ocasión, pero paecíen los candasinos los que podíen llevase’l gatu a l’agua.

Nun faltó discutiniu arbitral. Primero Borja Noval cometía una dudosa falta na banda esquierda de la área. Los marcapasos teyeros punxéronse a tope, paecía dientro. Sicasí’l colexáu xiblábala fora pa desesperación visitante.

Fora de xuegu señaláu sobre Álvaro Ponte cuando se llantaba solu ante Nacho a pase de Borja Argüelles. Dambos equipos siguen ensin crear peligru. Córner pal Candás. Eric tarda en sacar, y l’árbitru amuésa-y la segunda mariella. Ensin dulda rigorosa.

Quedaben diez más l’agregu, y el Ciares espúrriase. Borja Noval cabeciaba a gol, pero’l linier llevanta la bandera. Agora la desesperación ye local, nun lo cree’l bravu defensa.

D’ende a la fin, el Ciares intentábalo con más corazón que cabeza. El Candás sal rápidu a la contra, pero nun consigue crear ocasiones. Y el partíu muérrese.

Puntu agriduz pa dambos equipos. A dambos sabrálos a pocu, pero bien pervalible pa dambos. El Ceares caltien la ventaya de seis puntos, y el Candás atrapa al Xixón Industrial na tabla.

“Puntu ye puntu”, dicía Boskov. Pero dacuando, un puntu ye muncho más qu’un puntu.

Deporte Asturiano
Xixón Deporte
Programa Impulso 23

Ellaces d'interés
Enlaces de interés


Contautu
Contacto


Por TLF: L-V 16:30 a 21:00
La Cruz: X de 17:00 a 20:30

Tienda: 636 517 376
Administración: 684 601 308

Copyright ©2018 Unión Club Ceares

0
    0
    Carrito
    Tu carrito está vacíoVolver a la tienda