[Ciares 1-2 Colunga] El Colunga atópase con 3 puntos

El Ciares nun llogra ver puerta na segunda metá y d’ello aprovéchase’l Colunga pa llevar la victoria.

Nun foi quien el Ciares pa caltener la llínia positiva de los últimos dos partíos y ve como yeml Colunga quien lleva los puntos, faciendo simplemente un partíu prácticu. Sobre too tres d’una segunda metá na que sólo disparaba una vez a la portería defendía por Davo.

Aitor yera baxa por lesión, y el so puestu yera sustituyíu por Miguel. Tamién Hugo caía del once, volviendo Juan Carlos a la medular. El restu, los mesmos que veníen de pasar penriba del Urraca.

La primer parte nun destacó pol fútbol. Nengún de los dos equipos paeció faer nada fuera de lo común nin dio un pasu alantre buscando la victoria. Sólo Naya dexó muestres de la so calidá, con un gran recorte dientro del área, pero la xugada terminaba ensin consecuencies.

Hasta’l final nun se alegró l’alcuentru. Naya ayudábasr cola mano nel control, anque l’árbitru consideraba que lo facía de forma involuntaria, y yera derribáu cuando encaraba a Davo. El propiu Davo a puntu taba d’aparar el penalti, pero’l gol subía al marcador.

Un Dani Peláez de dulce ponía rápido la réplica. Balón que caza na frontal y de durísimu disparu cola pierna mala batía al porteru pelo alto. Tercer golazu en dos xornaes pa’l mediocentru zurdu.

Llegábase al descansu con más goles que xuegu, y col marcador igualáu. Amás, l’intermediu valía pa dar visibilidá a l’agresión sufrida por un miembru de la CNT durante la presente selmana.

La segunda parte paecía llocal. El balón yera teyeru, y se xugaba más tiempu en prau visitante. Pero, una vez más esta temporada, llega la derrota pa’l Ciares cuando más clara paecía la victoria.

La entrada de Marcos, formando pareya con Javi, añadió gol y mordiente al ataque. Jorge Cayarga, amás, intentábalo de manera continua. La ocasión más clara foi nun balón que llevaba Javi Gutierrez peleando. Internábasr nel área pela banda izquierda, y nel 3 pa ún cede’l balón atrás, pero pega nwl defensa. El rechace cae-y a Juan Carlos que dispara a la media vuelta, pero’l balón pega nel defensa. El Ciares pidió penalti por mano.

Una buena xugada pela banda izquierda de Jorge Cayarga, con pase atrás pa Dani Peláez que dispara abaxo. Parábala’l porteru en dos tiempos.

Dos faltes llaterales dende la banda derecha colgaba Dani Peláez con rosca, y a puntu tuvieron de terminar en gol. La primera buscóla Beni de cabeza y la rozaba. La segunda terminaría con remate de Juan Carlos en boca de gol, anuláu por fuera de xuegu.

El gol del Colunga llegaría na única llegada al área de la segunda parte. Un centru perfectu que termina con remate perfectu. Ver pa creer.

La más clara hasta’l final sería pa Marcos, pero dende la derecha, desequilibráu, nun podía definir y el disparu marchaba altu.

Nuevu golpe pa un Ciares que venía cola moral alta dempués de dos victories. Agora toca recuperar sensaciones de cara a la visita al Lenense del próximu domingu. La fe nunca falta.