[Ciares 1-3 Llugones] Descansu amocante

Segunda parte mala pal Ciares, que pierde col Llugones que lu superó nesi periodu y se complica la Copa Federación.

Y ye que’l Ciares de la segunda parte nun yera’l Ciares. Bien ye verdá que, lo mesmo que na primer parte, nada más entamaba encaxaba un gol que yera una llábana, pero en nengún momentu d’estos 45 fueron capaces de complicar la victoria a un Llugones que pudo descartase de la llucha pola Copa Federación, pero que sal metíu de llenu n’ella.

La baxa de Pablo Martínez y de Juan Carlos nel centru’l prau intentaba subsanala Iñaki Eraña cola inclusión de Dani Girón, que xugara d’estremu en Ganzábal, nel doble pivote xunto a César. Sorprendía la suplencia de Chery, dueñu y señor del carril zurdu durante tola temporada, que veía como Dani Hevia ocupaba la so posición a pierna cambiada. Yera llamativa la banda esquierda del Ciares esta tarde, con dos diestros. La buena noticia yera la vuelta de Beni, qu’enllazaba la suspensión tres del partíu contra’l Marinu con una llesión, y lu mantenía fuera del equipu durante meses.

El partíu tuvo un comienzu eléctricu. En sólo dos minutos l’árbitro decretaba fuera de xuegu cuando un xugador visitante encaraba a Davo, Marcos Iglesias casi marcaba tres rechace del porteru, y el Llugones adelantábase. Córner servíu dende la banda derecha, y Javi Tapia, mui solu, remataba a placer de cabeza.

Así que’l partíu servíase nel peor de los escenarios posibles, nel de la remontada. El Llugones, pese a la irregular temporada, dispón d’una plantiya con xugadores con clase y esperiencia en Tercera. Sorprende, al igual que’l Ceires, la so tibia posición na tabla.

Pudo empatar el Ciares, pero l’árbitru nun decretaba penalti cuando Marcos superaba al cancerberu visitante per enriba y yera arrolláu. El balón yera salváu na llínia pola defensa.

Marcos Iglesias siguió demostrando’l porqué de la so cifra de goles, y tuvo a piques de marcar en dos ocasiones más. Primero con una volea que marchaba alta, y dempués con un gran testarazu qu’obligó a Pablo Herrero a llucise.

Sicasí, yera Cris Alonso el qu’algamaba l’empate. Partiendo del so estremu díbase de dos xugadores, y cuando paecía que diba a centrar disparaba raso buscando’l palu llargu llevando l’alegría a la grada.

Repetíase’l guión na segunda parte. Na primer xugada, centru dende la banda esquierda y remate solu pa un Davo que poco podía facer. Diba sólo una hora en que se tenía vivío lo mesmo pero na otra portería.

A partir d’ehí, el Ciares convertíase nun quiero y nun puedo. Davo salvaba la sentencia, cuando Wilmer marchaba de varios, y con too a favor nun yera quien a batir al del barriu. Tuvo otra ocasión más, salvando un disparu al palu cortu.

El Ciares, pocu. Sólu durante los 10 minutos caberos llevó un poco la incertidumbre al marcador, enzarrando al Llugones tres de varios córners y faltes. La más clara teníala Cris nun disparu que refugaba la defensa. César disfrutó d’una falta na frontal, forzada por mano tres d’una gran maniobra de Beni, pero colaba alta.

Yá nel descuentu, y colos llocales buscando l’empate, un pase de la muerte yera aprovecháu por Chus pa subir el terceru al marcador y sentenciar un alcuentru que yá quedara marcáu nel minutu 46.

Y la prósima plaza nun ye la meyor pa sumar, visitando Noreña pa enfrentarse a un Condal lluchando pola cuarta plaza. Y ye qu’agora súmase’l Lulgones a la llucha. El domingu, un pasu más.