Dos importantes baxes condicionaben l’once del Ciares na mañanera dominical. Per un sitiu, la yá sabida de Pelayo Torre per acumuladura de amonestaciones y por otru, Jimmy yera baxa d’última hora por enfermedá. Arregló Nacho Cabo l’alliniación llevando a Pichón a la media punta y a Ponte como nueve puru dempués del so gran partíu nel Candín.

Non demasiaes ocasiones na primer parte y dominiu alternu. Empezó meyor L´Entregu, apoderando más el balón. Pudo abrir yá’l marcador el siempres peligrosu Jairo Cárcaba pero’l so remate díbase fora.

Les dos primeres llegaes del Ciares acabaron en faltes a escasos centímetros de la área. Na primera, pa Pablo Martínez, optó por tirar al palu del porteru, pero estenó Pablo. La segunda yera pa Borja Noval. Probó per debaxo de la barrera pero los xugadores de Redondo nun saltaron. Nesta falta los xugadores del Ciares pidieron la espulsión del central Mini al consideralu últimu home.

Mediada la primer metá, el dominiu yera ciarista. Durába-y el balón a los brickers, ante un L´Entregu que sabía cerrase a la perfección. Sicasí los minutos siguíen pasando, y les ocasiones nun llegaben. Los postreros 10 minutos fueron de dominiu visitante, nel balón y nes ocasiones. El xixonés Jairo remataba un bon centru d’Álvarez pero díbase altu.

El partíu empezó igual na segunda parte. El balón pa los visitantes, ante un Ciares que sufría más de lo normal. San Eloy foi’l primeru n’acorar al ciarismu, en rematando una gran contra con un disparu al llargueru. Los minutos pasaben y el Ciares nun llegaba enriba, L´Entregu quería los 3 puntos.

Los teyeros xugábense más que los de Redondo, pero paecíen agazapaos esperando salir rápido a la contra con Pichón y Borja Argüelles, mas Ponte pa rematar dalguna.

Asina llegó’l gol, balón penriba a Pichón, estena Pablo de puños y cai-y el balón a Ponte que la enchufa ensin dexala cayer. Apoteosis na grada y nel campu.

El Ciares poníase por delantre.

Quedaben 20 minutos, y creíase que L´Entregu diba apertar. Pero curiosamente coincidió colos meyores momentos del club de la Teyerona. Juan Carlos, Pablo Martínez y Meana entamaron munches combinaciones. El balón yera so, los de mariellu escorríenlu.

Coló Ponte con una gran ovación. Entró Rubo, xugador más rápidu p’apostar los últimos minutos. Apenes acababa d’entrar, gran acaballada dende la esquierda que remata con un disparu cola maniega que buscaba la escuadra.

Yá nel descuentu, Borja Argüelles ponía dende banda derecha y el balón qu’entraba pela escuadra del palu llargu.

Y cayóse la cruz.

Cinco partíos pal Ciares. Cinco partíos pa rematar el suañu. 15 puntos, namás 15 puntos.