[Ciares 2-1 L.lenense] Aitor baltó’l muriu
El Ceares robló la primer remontada de la temporada ante la S.D. L.lenense nun partíu llocu que sirvió d’homenaxe a Pichón.
Que los equipos van cerrase al venir a La Cruz, ye un fechu. Qu’esti equipu ta capacitáu p’abrir cerrojos, tamién. Güei túvose qu’esperar hasta l’últimu momentu, cuando Aitor marcaba de falta directa y la Cruz alloriaba. Quedaben 3 minutos, pero perdonárase enforma.
Ceares 2 – 1 Lenense
Ciares: Davo; Fonso, Prendes, Beni, Aitor; Jorge Vázquez (Lozano 70′), Juan Carlos, Jimmy, Pichón, Cris (Chery 60′) y Ponte (Bryan 60′)
L.lenense: Segura; Brian (Noé 49′), Adrián Sanz, Adrián Fuentes, Ricardo; Miguel Ángel, Martín (Emilio 46′), Guillermo; Hugo, Damián y Valdés
Goles: 0-1: Hugo 55′
1-1: Prendes 63′
2-1: Aitor Cañedo 87′
Árbitru: Rodríguez García (Nalón). Amonestó pol Ciares a Ponte y pol L.lenense a Adrián Sanz y Rubén Valdés.
Incidencies: Alcuentru correspondiente a la sexta xornada de la Tercer División asturiana xugau en La Cruz ante unos 350 espectadores. Terren de xuegu en perfeutu estau. Pablo Fuego realizó el saque d’honor como presentación de la velada del prósimu sábadu en La Cruz.
Salía dominador el Ciares. Mandaba sobre’l campu, y nun dexaba respiru a un L.lenense más esmolecíu d’aparcar lo meyor posible l’autocar delantre de la so portería que de buscar la de Davo. Sicasí, los visitantes tuvieron la primera. Contra que dexa solu a Hugo, pero define enriba. Primer plasmu.
Siguía llegando’l Ciares a portería, con ocasiones de toos los colores. Juan Carlos engabitaba por embaxo, pero’l so remate díbase raspiándo’l palu defendíu por Segura. Cocíase’l gol local, pero una nueva contra vuelve provocar un mano a mano con Davo que de nuevu nun sabe definir el atacante l.lenizu. Segundu plasmu.
La más clara pa los brickers. Balón que peña Ponte nel primer palu, y Jimmy remata de cabeza pero vase al llargueru.
L’empate ensin goles al descansu raspiaba’l surrealismu. Ocasiones clares pa los dos, pero’l marcador ensin estrenase.
Paecía meyor el L.lenense na segunda parte, más dominador. Rubén Valdés llantábase na área, y dende’l picu disparaba a la escuadra de Davo, que volaba pa realizar una de les paraes del día, y llevar el balón al palu. Tercer plasmu.
Al cuartu plasmu, muerte. Internada d’Hugo pol estremu derechu de la área, y bate cruciáu a Davo. Adelantrábase’l L.lenense, col partíu trabáu.
Ofensiva bricker. Córner dende banda derecha. Disparos y refugues, disparos y refugues. Prendes ye’l postreru en tocala. Gol. Va Beni a pol balón. A la llucha, quedaba tiempu.
Davo realizaba otru paradón a espetaperru, previa a una ocasión perclara de Bryan. Que se llantaba ante Segura pero’l porteru visitante espeyaba a córner. Casi gol. Empezaba’l festival.
Remate de cabeza de Beni. Casi gol. Jugadón de Juan Carlos, que se va de la metá del once titular del L.lenense, dexabala pa Pichón que fusila a Segura. Parada enriba. Casi gol. Remate en plancha de Jimmy que se va alto. Casi gol. Disparu de Juan Carlos dende dientro de la área que llambe’l llargueru. Casi gol.
Cuando amorrentaba’l partíu, falta sobre Bryan na frontera. Juan Carlos y Aitor asitien el balón. Péga-y Aitor. Vuela sobre la barrera y cólase xuntu al palu. La llocura.
Y dempués del pitíu final, namás quedaba recorda-y a Pichón onde tien la so casa.
