[Ciares 2-2 Urraca] Un empate con dos lectures

Boxing Day 2014

Recibíamos al 2014 col Boxing Day, el partíu en que los neños son los auténticos protagonistes, en que neños y padres esfruten d’una xornada futbolística. A pesar del fríu, nun fueron pocos los “katxorros” ciaristas qu’allegaron a sofitar al so equipu y a fotografiase colos xugadores del primer equipu, colos sos referentes.

Boxing Day 2014
Los equipos posen mientres el Boxing Day 2014

Arrincaba’l Ceares como sabe, tocando’l balón, mazcando les xugaes. Asocedíense les llegaes a la área visitante dende dambes bandes. El fuerte vientu condicionaba’l xuegu y el porteru visitante vivía en cantu del erru.

Primero intentolo Ponte, pero disparaba desequilibráu cola maniega y el balón yera salváu na llínea. Borja Noval tamién tuvo la suya, nuna falta perfilada pa la so maniega, pero’l balón yera salváu por Ricardo cuando buscaba la escuadra esquierda de la so meta. Pablo Martínez raspió’l gol olímpicu en xugándo-y l’aire una mala xugada al porteru visitante, y Pichón buscó la mesma escuadra que Borja Noval, pero colábase llixeramente alto’l so disparu.

Ceares 2 – 2 Urraca

Ciares: Kike, Fonso Bellón, Lozano, Borja Noval, Aitor, Juan Carlos, Pablo Martínez (Meana 65′), Borja Argüelles (Rubo 80′), Pichón, Pelayo Torre, Ponte (Jimmy 50′)

Urraca: Ricardo, Pablo Díaz, Suero, Hugo, Víctor, Arroyabe, Íñigo (Cuanda 81′), Miguel Ángel, José Luis, Sergio, Yoni

Goles:
0-1: Arroyabe 40′
1-1: Pichón 48′
2-1: Juan Carlos 62′
2-2: Yoni 69′

Árbitru: Baniela García, del Colexu Avilesin. Amonestó a Aitor por parte’l Ciares, y a Iñigo por el Urraca. Ensin complicaciones.

Incidencies: 500 espectadores nel Campu de la Cruz. Terren de xuegu blandu poles lluvies. Dificil climatoloxía pal Boxing Day.

Sicasí, primer vegada que s’asoma’l Urraca a la área de Kike y llega el gol. El cancerberu local salva’l primer disparu, pero nel córner posterior, el so refugue queda muertu pa que Arroyabe emburrie a la rede.

Llegose al descansu en mediu de la envernada, agua, vientu, xarazo, y de xuegu cearista. Sicasí, el Urraca diba per delantre. Quedaben 45 minutos más.

Apenes daba empiezu, gran balón en llongura de Lozano dende la llínea de tras buscando l’espaciu. Pichón controla empobinando’l balón a la so diestra, y pícalu ante la salida de Ricardo. Enésimu golazu del polifacéticu xugador xixonés, que rindió a la perfección en toles posiciones onde xugó esta temporada.

La entrada del capitán Jimmy yera como siempres providencial. Córner que peña y remacha Juan Carlos nel segundu palu. El Ceares adelantrábase y nada paecía que pudiera quita-y victoria. Pero’l fútbol ye malo d’esplicar, y apenes 7 minutos dempués, na segunda y última llegada del Urraca a la área contraria, empataba con una gran cabezada de Jony.

D’ende a la fin, siguió intentandolo el Ciares, pero ensin resultancia.

Un puntu que va dexar más contentu al Urraca que al Ciares, a pesar de llegar al descansu perdiendo. Los de Nacho Cabo recuperen la meyor versión del so xuegu, sobremanera na primer parte, primero que’l campu empiorara. El puntu sirve por que la Cruz siga siendo un fortín esta temporada, onde nengún visitante consiguió salir colos 3 puntos. Xineru y Febreru son dos meses lluviosos, esperemos que’l verde aguante y l’equipu pueda siguir xugando cómo sabe.

Agora espéranos el Tourmalet, coles visites al Requexón y a Ganzábal. Pruebes de fueu. Non yá pa nós, tamién pa los nuesos rivales…

0
    0
    Carrito
    Tu carrito está vacíoVolver a la tienda