[Ciares 5-1 Astur] Segundes partes delles veces son meyores
Los de Miguelín regalen los meyores 45 minutos de la temporada na 2ª parte, arroyando a un Ástur que se foi desenchiendo per segundos.
Nada facía abarruntar a les 300 persones qu’allegaren esta tarde al descansu, que na segunda parte diben ser testigos de 45 minutos plenos de fútbol y goles. Mientres los anteriores 45 nun vieren nada destacáu, nin goles, nin disparos, nin faltes, nin triangulaciones.
Ciares 5 – 1 Astur
Ciares: Kike; Fonzo, Lozano, Beni, Chery (Ponte 67′); Aitor, Juan Carlos; Bryan, Jimmy (Chipi 75′), Cris (Berto 51′) y Polo.
Astur: Borja Trelles; Mariano, Guillermo (Javi 61′), Guille, Alonso, Trelles, Pelayo Torre (Borja 61′), Jonás, Turu (Álex 68′), Casielles y Cris.
Goles:
1-0: Polo 46′
2-0: Jimmy 49′
3-0: Jimmy 52′
4-0: Ponte 70′
4-1: Berto (P.P.) 84′
5-1: Polo 90′
Árbitru: González González (Nalón). Amonestó pol Ciares a Polo.
Incidencies: Alcuentru correspondiente a la trixésimo tercer xornada de la Tercer División d’Asturies acontecíu en La Cruz ante 350 espectadores. Terren de xuegu en buen estáu.
Nun faltaben alicientes a priori pa xubir a La Cruz el domingu. Ente ellos, la vuelta de Pelayo Torre, el mediapunta cayíu a banda esquierda indiscutible pa Nacho Cabo na primer clasificación pa play-off de los teyeros. Siempres col 9 al llombu, siempres tratando’l balón con clase.
La charra de Miguelín al descaso tuvo de surtir efectu, yá que na primer xugada de la segunda parte Lozano tocaba de cabeza y Polo llevaba’l balón al fondu de la rede. Plenu d’eficacia ciarista, con gol na primer oportunidá.
La segunda foi p’Aitor Cañedo, que tres xugada de Cris Alonso per banda esquierda disparaba buscando la escuadra, pero namás la llambía. Ensin dulda yera otru equipu.
A la tercera volvía’l gol. Gran xugada de Chery, que la dexa a Jimmy por que a placer emburrie’l balón. El capitán sigue la so racha.
Y siguió con ella namás dos minutos dempués, cuando de nuevu volvía marcar, esta vegada dende’l puntu de penalti, cola maniega. Otra vegada con un balón puestu por Chery.
Por increíble que paeza, estos 3 goles asocediéronse namás en 7 minutos. Al descansu 0-0, y nel minutu 52, 3-0 y partíu decidíu.
La defensa del Ástur paeció dexase llevar nesta segunda parte. La delantrera ciarista rompía’l fora de xuegu con absoluta facilidá, llantándose ante’l porteru costantemente. Asina llegó’l cuartu, Ponte y Polo delantre del porteru. Polo dexa-yla a Ponte, y Ponte marca a puerta vacida. De nuevu “Ponte Polo”. Asocedíense les ocasiones. Polo intentábalo de vaselina, tuvo otru mano a mano, y tamién Ponte tenía dalguna. Sicasí marcaba l’Ástur cuando’l partíu amorrentaba. Balón que-y bota mal a Berto Vallina cuando diba estenar na llínea de gol y termina dientro.
Paecía qu’acababa asina’l partíu, pero Polo dexaba la so nota de clase de nuevu, batiendo con preciosa vaselina a un desesperáu Borja Trelles.
Nun hebo tiempu pa más. Victoria balsámica, estos trés puntos facíen falta. Amás, con una brillosa segunda parte de xuegu y goles. Próximu capítulu: Uviéu B.