[Colunga 1-2 Ciares] Caleyando ente dinosaurios
El Ciares trae 3 puntos de Colunga, nun partíu nel que los llocales paez que sólo desixeron en determinaos momentos.
Presentábase un partíu difícil en Colunga pa’l Ciares. Los llocales yá ficieren un partíu mui bonu na día en La Cruz y llevaren los puntos. Agora, dambos equipos se situaben na metá alta de la tabla, separtaos únicamente por un puntu. Los teyeros cola so victoria abren marxen y siguen con pasu firme escontra los puestos de Copa Federación.
Los de Tino acudíen al choque con munches baxes. El preparador xixonés tuvo qu’echar mano del xuvenil pa rellenar la convocatoria, yá que sólo 13 xugadores del primer equipu taben disponibles. Hugo y Aitor entraben na llista de 16. Nesti casu, Aitor yá tenía debutao, mientres qu’Hugo disfrutaba d’una llarga llista de minutos disputaos en Tercera.
Colunga 1 – 2 Ciares
Colunga: Nahuel, Luis, Busta (Miguel 36′), José Ángel, Usillos, Dani Girol (Manu 46′), Zucu, Marcos (Sabou 82′), Jorge, Viti, Naya
Ciares: Nacho, Miguel, Iván, Beni, Chery, Juan Carlos, Dani Peláez, Cris, Pablo Martínez (Hugo 89′), Cayarga, Javi Gutiérrez
Goles:
0-1: Cris’
1-1: Luis 58′
1-2: Cayarga 60′
Árbitru: Gonzalez González, del Colexu del Nalón. Amonestó a Viti, Girol y José Ángel por parte del Colunga. Espulsó con colorada directa a Zucu nel minutu 40.
Incidencies: Partíu apostáu açente 100 espectadores, con amplia presencia de siguidores visitantes. Los cuales amosaron una pancarta de sofitu a la llucha contra la LGTBI fobia. Terrenu de xuegu en condiciones aceptables.
Los primeros minutos paecíen más claros pa los teyeros, si bien el xuegu yera equilibráu. De fechu, como’l día de Noreña, cuando más claru se-y puso’l partíu al Ciares, peor xugó. Mandaron once sobre once, pero cuando Zucu, xugador del Colunga, hera espulsáu, foi cuando los llocales llevaron más peligru.
Tres dellos averamientos por dambos equipos, cuando apenes se superaren los 20 minutos, un balón de Javi Gutiérrez dexábalu pasar intelixentemente Pablo Martínez, y Cris, con pierna zurda, marcaba abaxo.
A partir d’ehí foi mui claru’l dominiu visitante, que malpenes sufría atrás, anque tampoco nun disponía d’ocasiones clares p’arremachar. Al borde del descansu, una trifulca nel área visitante terminaba cola reseñada espulsión del xugador llocal Zucu.
Paecía decantáu l’alcuentru, pero na segunda parte salíen los llocales dispuestos a igualar el partíu. Los de Tino daben un pasu atrás, y aprovechaba’l Colunga pa llevar inquietú a un Nacho sobriu.
Primero yera un llanzamientu llateral de falta, mui bien executáu a la frontal del área chica, que yera rematáu alto. Primer avisu seriu.
Pa’l segundu nin avisaron. Disparu de Luis dende’ so propiu campu al que nun puede llegar Nacho y se cuela mui cerca del poste izquierdu. Golazu de los de bandera.
Sicasí, Cayarga, que sigue cola so particular racha positiva, subía al siguiente minutu’l segundu gol y dexaba la moral llocal pelos suelos, al ver que caía lo que tanto-yos costara llevantar. L’estremu teyeru enganchaba un gran disparu dende la frontal del área. Golazu de nuevu.
D’ehí al final, un disparu duru que sal centráu y detién Nacho bien colocáu, o la más clara, nun mano a mano de Naya con Nacho al que’l veteranu punta-y pega mal y sal mui desviada.
Pudo Cris aumentar tamién la renta, cuando una bona xugada terminaba con disparu de so en bona posición, pero’l so remate col interior del pie despexábalu Nahuel.
Tres puntos importantes, con munches baxes y a simple vista paez que sin requerir gran esfuerzu. Nada menos que 40 sumen ya. Agora toca un L.lenense con problemes clasificatorios serios, recuperando l’horariu de sábadu. Toca tarde futbolera.
