COMUNICÁU OFICIAL | Ni son 3,7 millones, nin mos salen les cuentes

Dende el Gijón Fútbol Femenino ya l’Unión Club Ceares, tres varies consultes a profesionales del sector ya en base a tolos conceyos mantenidos mientres estos meses, afirmamos que la cifra apuntada nun se corresponde con un proyectu d’estes característiques y que la so filtración ye malintencionada y fabricada pa dañar el proyectu.

Esiximos que s’amuese el desglose d’esi importe ya que nenguno de los profesionales consultaos entiende, evaluando al rodiu les instalaciones planificaes, qu’el presupuestu pueda ser el filtráu. Esi montante pareznos, también a nos, desproporcionáu ya excesivu pa unes instalaciones d’estes característiques ya dalgo inasumible pa l’ayalga municipal.

De siguío, vamos a detallar el procesu que nos traxo hasta equí pa aclaración a la opinión pública.

Les ubicaciones

Queremos destacar qu’ambos clubes tuvimos siempres abiertos a toles opciones, buscando siempres el menor coste y el menor impactu nel parque. Durante esti procesu acudimos a milenta reuniones onde se evaluaron delles propuestea. Inclusu propusimos dalgunes en zones perifériques del barriu a pesar de que, en principiu, diríen contra los nuestros intereses polo lloñe dende’l nuestru campu actual y la nuestra zona d’influencia. Toes fueron refugaes ensin nengún argumentu meyor que’l “ehí nun se puede”.

Polo tanto la ubicación escoyida llega casi como consecuencia lóxica, o eso se nos indica. La única alternativa posible, por motivos urbanísticos, podría retrasar el proyectu munchos años o que nun llegara a facese.

Esi retrasu ye dalgo inviable pa’l Gijón Fútbol Femenino cuyos equipos, como yá perdiximos en múltiples ocasiones, en dalgunos casos cuenten cola maraviya de 1h 30m de entrenamientu disponible a la selmana. Falamos de los que fueron dende l’añu 2000 únicos equipos femeninos de fútbol base de la ciudá. Creemos que nun fai falta afondar demasiao na perspectiva feminista pa dase cuenta del agraviu qu’esto supón pa un club que lleva casi 20 años lluchando por dar la oportunidá de xugar a neñes y, más importante si cabe por nun ser yá categoríes mistes, muyeres de la ciudá, fuera del ámbitu de los clubes profesionales reservaos al altu rendimientu.

En nengún momentu durante estes conversaciones se mencionó’l coste qu’agora se menciona. Nin tan siquiera se insinuó que’ l coste fuera a ser mayor qu’en cualesquier otru sitiu, yá que siempres se baraxaba una cifra ente 1.2 y 1.5 millones, perbaxo del coste de la mayoría de les instalaciones esistentes inclusu ensin tener en cuenta que se ficieron va unos años.

El proyectu

Otra circunstancia estraña ye’l diseñu del proyectu en sí. Los bocetos que salen al públicu, como l’apaecíu na noticia d’El Comercio, planteguen un campu completamente independiente con total duplicidá de volúmenes y d’espacios, dalgo que en nengún momentu tuvo sobre la mesa pol impactu que tendría nel parque.

Siempres se plantegó como un anexu de dimensiones reduciea onde’l gruesu de los volúmenes del proyectu taríen dientro del espaciu que güei ocupa La Cruz. Sacantes del memorial del Comité Ciudadano AntiSIDA de Asturias, colectivu col que mantuvieron conversaciones y se-yos agradeció’l so compromisu y sofitu mediante un comunicáu, situaríase nun espaciu mui degradáu anguaño de Los Pericones. Una zona enllena de basura, xeringues, preservativos usaos, etc. como la propia arquitecta municipal pudo comprobar na so visita a les nuestres instalaciones. Pol otru lláu, parez que s’escaez qu’el parque ya tien al so rodiu una piscina, pistes de tenis y padel, un pabellón polideportivu, dos campos de fútbol ya hasta una gasolinera.

Sicasí, cada vez qu’apaez dalgo relativo al proyectu en prensa failo representáu de la peor manera posible, eleváu, cerca de los edificios del barriu, d’unes dimensiones muncho mayores de les reales y con unos taludes que, nes reuniones manteníes sobre’l mesmu, nunca nun tuvieron presentes.

La información

Durante esti proyectu, dau qu’afectaba principalmente a les instalaciones qu’hasta ahora utilizaba n’esclusiva’l UC Ceares y qu’a partir de agora pasaría a compartir, tresmitiósenos que cualquier fito importante del proyectu se nos diba comunicar con antelación. De sópitu vemos qu’un proyectu que diferentes organismos municipales cifraben alredor del millón d’euros dispárase presuntamente a los 3,7 millones, enterándonos nós pola prensa.

Nun nos paez de recibolu y va completamente en contra de la manera de trabayar que teníemos fixada. Por supuestolu, naide paez conocer l’orixen d’esa comunicación a la prensa.

Per otru llau, consultando a profesionales esternos, indíquennos que ven un coste desorbitáu pa eses instalaciones y que-yos resulta incomprensible que se plantegue esa cifra tan elevada pa la execución del proyectu. Nun dimos con nengún arquitectu esternu que vea razonable’l coste que se plantega. Quizá la solución pase por esternalizar yá que los problemas paecen ser más de voluntaes que técnicos.

La falacia sobre l’escesu de campos de fútbol

Lleímos con estupor na prensa a dalgunos grupos políticos alegando que se podía reubicar al Gijón Fútbol Femenino n’instalaciones esistentes sin mayor problema. Teniendo en cuenta’l por qué llegamos a esta situación, paeznos una desfachatez y un actu de cinismu impresionante .

Si dalgo pudo comprobar el Patronato Deportivo Municipal nel so intentu por reorganizar l’usu de les instalaciones actuales, ye qu’en realidá esiste un déficit tremendu de campos de herba artificial na ciudá . La demanda d’hores por parte d’equipos de fútbol base pa entrenar n’esta superficie (poques personea acepten que les sos fíes y fíos entrenen n’arena o barru) supera ampliamente les disponibles, independientemente de que les utilice un club o otru.

De fechu tou esti proyectu naz precisamente d’eses circunstancies, de l’aceptación por parte del ayuntamientu de la imposibilidá de proporciona-y al únicu club de base femenín de la ciudá unes condiciones dignes. El resultáu d’aquel intentu fueron horarios tan malos como los d’anguaño sumaos a una disgregación per diverses instalaciones inasumible pa entrenador@s y voluntari@s. Nun falemos yá de planteganos una escuela mista pudiendo planificar sesiones conxuntes paritaries, cuando nesti momentu pa aproximadamente unes 250 fiches, de lea cuales un 35% son femenines (un porcentaxe altísimu nel fútbol), tamos entrenando en cuatro instalaciones diferentes.

Independientemente de la xestión, nun hay campos d’herba artificial abondos na ciudá y eso ta xenerando que los clubes que nun pueden acceder a ún corran riesgu de desapaecer. Ye bien fácil confundir a la ciudadanía a esti respectu , pero la realidá ye esa, especialmente nea franxes horaries aptes pa’l fútbol base.

Por tolo anterior, solicitamos que se vaya de frente, que se digan cuales son les causes pa tantu trasiegu y qu’a lo menos se de una rempuesta clara sobre cual va ser la situación nos próximos años, ensin escaecer el desglose d’esti presupuestu darréu.

El Gijón Fútbol Femenino y el UC Ceares tenemos un proyectu nomáu Escuela Mixta de Fútbol. Proyectu que ta inspirando otros similares n’otres ciudaes, proyectu que tien como elementos diferenciadores la promoción del deporte femenín y la educación pa la igualdá a través del fútbol, pero que requier d’unos medios materiales de los que nun disponemos. Necesitamos una rempuesta clara pa siguir alantre o pa abandonar. Nun ta nes nuestres manes.

Deporte Asturiano
Ayuntamientu de Xixón

Ellaces d'interés
Enlaces de interés


Contautu
Contacto


Por TLF: L-V 16:30 a 21:00
La Cruz: X de 19:30 a 21:30

Tienda: +34 636 517 376
Secretaría: +34 637 521 674
Prensa: +34 646 862 239
Sec. Técnica: +34 646 862 239
F. Femenino: +34 635 899 370
F. Base: +34 618 149 800
F. Sala: +34 627 534 266

Copyright ©2018 Unión Club Ceares