Dos espulsiones innecesaries, pero clares, de los chacineros sirven en bandexa’l triunfu al Ciares. Doblete de Cayarga no postrero del partíu.

 

Pente la temida “cicloxénesis esplosiva” desarrollábase’l partíu, como esplosiva ye la defensa del Condal a la hora d’entrar al choque. Mori, xugador avezáu a estos asuntos, autoexpulsábase a falta de 25 minutos con una entrada tan dura como innecesaria sobre Marcos Iglesias en metá del prau. Carlinos puso la guinda, al dexase caer cuando entraba nel área y ver la segunda tarxeta.

Y ye que’l Ciares ganó casi por inercia. Nin siquiera con dos homes más llevó demasiáu peligru sobre la portería del Carlos Castro menos conocíu del fútbol asturianu. Dos goles al final de Cayarga, que sigue cola racha, llevaben los 3 puntos pa Los Pericones.

Pero ye que xugar na finca del Condal esti domingu nun yera fácil. Terrenu llamuergoso, onde se frenaba’l balón. Lo más peligroso llegaba en balones perriba. Balón pelo alto y a peleala, y d’eso Marcos Iglesias y Javi Gutiérrez saben.

Debutaba’l fichaxe d’hibiernu ciarista. Miguel Obaya, llateral diestru procedente del Llealtá entraba nel once por Natan, y realizaba buen papel a pesar de las dures piedres de toque que tenía enfrente.

Na primer parte poco reseñable, quitando un paradón de Nacho a disparu de Rueda. El cancerberu teyeru continúa la temporada, valga la ironía, imparable.

Na segunda parte llegó la chicha. Mori, xugador que nun ye de los que templen los nervios, tenía dura pelea con Marcos. Y esti, al tiempu, nun ye de los qu’ayuden a templalos. Inclusu segundos enantes sabíase que venía un hachazu, cuando controlaba’l balón Marcos d’espaldes a la portería, lloñe de zona de peligru. Da la vuelta y cuando marchaba, Mori realizaba una entrada innecesaria y alevosa que lu mandaba a vestuarios antes de tiempu.

Nun foi meyor el Ciares con unu más. Paez que la espulsión dio más ales a los llocales qu’a los visitantes, que llegaron inclusu más al área contraria. Nuna d’eses llegaes, l’ex del Sporting B Carlinos, que marchara de dos, déxase caer de manera torpe. La sobreactuación al finxir dolor na pierna nun-y valió pa muncho, y veía la segunda mariella.

Con 2 más yera’l momentu de tocar el balón, pero poco se podía facer según taba’l prau. Pasaben los minutos y diba inquietándose l’ambiente, yá que nun se llegaba con peligru a la portería chacinera.

Juanín entró al prau pa llevar peligru, con un par de llegaes pela banda derecha que facíen resoplar a los siguidores visitantes.

Pero nel 89, y na única ocasión depués de 28 minutos de superioridá, Cayarga afuracaba la portería y daba los 3 puntos a los de Tino.

Ya nel descuentu, un pase atrás de Javi volvía a rematalu Jorge y sentenciaba’l partíu, quizás sentenciáu muncho enantes.

Ciares y Condal llegaben empataos a puntos al partíu, polo que consigue despegase llixeramente d’ellos. Agora toca un Urraca cola soga al pescuezu, más necesitáu de puntos que naide, cola solombra de la preferente encima. Dempués de dos desplazamientos, torna’l fútbol al barriu.