[Covadonga 0-0 Ciares] Suma y sigue

Puntu importante l’algamáu pol Ciares nel campu complicáu del Covadonga. Los de Tino siguen enganchaos al tren de cabeza.

Llegaba’l Ciares al Rabanal tres consiguir la victoria en La Cruz frente al Uviéu B. Alcuentru dificil que dexaba a los teyeros enganchaos a los puestos del pelotón de cabeza. Tocaba agora’l Covadonga, otru de los equipos de la zona noble, con gran plantiya. Pese al so gran entamu, paecía tener cortada la racha caberamente. Sólo 4 puntos separaben a dambos equipos na tabla.

Eso sí, el Covadonga puede presumir de plantiya. Con xugadores de la talla de César Negredo y Jandro, dambos ex del Uviéu, o d’Imanol, finu media punta con esperiencia en Segunda B, que despachó un gran partido en La Cruz l’añu del play off, cuando formaba nes files del Cuideiru.

Les buenas relaciones entre dambos equipos propicien l’entendimientu. Y de nuevu, ente la rebaxa de precios nes entraes, un gran númberu de siguidores ciaristas pusieron rumbu a Uviéu pa asistir a un alcuentru que siempre ta marcáu na axenda.

Tino salía col dibuxu clásicu. Con Cristian, Cayarga y Guille Barquero en llínia de 3, con Marcos per delantre. Na sala de máquines Dani Peláez mandaba y Hugo cortaba. Per detrás, Nacho repetía titularidá, Natan cada día más afianzáu nel llateral diestru, Chery nel zurdu, y Aitor y Fonso na exa de la zaga.

La primer ocasión teníala’l Covadonga, nun remate de tiesta nel primer palu que marchaba cruzáu per mui poco. Ponía la réplica Aitor Cañedo, controlando un centru de falta de Dani Peláez, pero’l rechace diba al poste.

Partíu de munchu control y non demasiáu xuegu. Los llocales trataben de mandar, pero nun inquietaben a los visitantes. Los teyeros, vestíos col traxe conmemorativu del 70 aniversariu del club, xugaben mui cómodos y combinaben bien ente llínies. Jorge Cayarga y Dani búsquense ente llínies y caltienen con solvencia la posesión del balón.

Ocasión clara pa Marcos, que remataba de cabeza. Pero’l balón diba a les manes del porteru llocal, que topaba con ella. Reclamábase penalti dempués nuna gran internada de Guille Barquero pela banda izquierda, tres d’un hábil slalom.

Pero la más clara del partíu teníala’l Covadonga cuando se llegaba al descansu. Testarazu a bocaxarru, pero Nacho despexaba y el balón marchaba milagrosamente al llargueru. Ovación merecía pal cancerberu.

Poco camudaron les coses tres d’el descansu. Si acasu, el Ciares paeció perder llegada y cedió más terrenu a unos llocales, que si bien nun dispusieron d’ocasiones clarws, si paeció rondar el gol per momentos. Muncho más complicao pisar área pa los de Tino, que intentaben salir rápido pero’l balón durába-yos menos que nos primeros 45.

Escurríase-y el balón a Nacho nun córner, y se-yos encoyía’l corazón a los más de 80 ciaristas desplazaos a Uviéu. Pero l’árbitru señalaba falta y anulaba la xugada que terminaría en gol.

Sobre too a balón paráu sufríen los xugadores visitantes. Pero la presencia de Beni en prau amenorgaba les ocasiones llocales. Tamién Iván Suárez y Javi Gutiérrez dispusieron de minutos.

Al final, buen puntu nun prai onde non munchos equipos van puntuar. El Ciares sigue engancháu y agora tien ocasión nel Boxing Day de meter distancia al Llanes, rival directu. Un día especial pa la parroquia llocal, que brinda’l merecíu homenaxe a la reciella que forma parte del club, tanto presente como futuru.