[Cuadonga 0-2 Ciares] Dobletazu de Ponte

Primera selmana completa de trabayu del nuevu míster, Iñaki Eraña, y yá se noten los cambios respectu al so predecesor Miguelín. El Ciares de güei nun busca tantu l’ataque directu, manexa más el balón y pausa’l xuegu.

Arranque prodixosu de los teyeros. Apenes dexaba d’oyise l’himnu de los llocales, Marcos Iglesias finalizaba una buena xugada con disparu que buscaba la escuadra dende la esquina izquierda del área.

Pocu dempués yera César quien ponía a prueba a Aitor, porteru llocal. Llanzaba una gran falta qu’obligaba al cancerberu a emplegase a fondu y volar a la so escuadra derecha.

Pero la más clara yera pal protagonista de la mañana, Álvaro Ponte. César aguantaba mui bien el balón en zona de tres cuartos. Veía’l desmarque de Cris y ponía-yla al güecu. Ésti dexa solu a Marcos qu’encara al porteru, cede-yla a Ponte pero nun puede definir.

Tres d’esta xugada el Covadonga trató de poner orden. Pasaben los minutos ensin ocasiones pa nengún de los dos equipos, con más centrocampismu que xuegu. Sin embargu, el Ciares tampocu condecía ocasiones, veíaselos cómodos nel verde uvieín.

Al borde del descansu adelantábense los coloraos de la Teyerona. Ponte disparaba sin ángulu dende dientro del área y el balón colábase na portería d’Aitor. Gol en momentu psicolóxicu además.

La primera na segunda parte tamién yera visitante. Marcos presionaba (al igual que Ponte incansables en tarees defensives), roba’l balón a ún de los centrales, pero se cruza’ so compañeru nel momentu en que diba a definir.

Cincuenta y cinco minutos tardaron los llocales en disparar a puerta. Foi tras xugada per banda derecha, pase atrás, y disparu per baxu. Davo despexaba a córner.

Sentenciaba’l Ciares otra vez a través de Ponte. Pablo Martínez servía un gran córner dende banda izquierda, y l’ariete xixonés remataba col muslu nel segundu palu. La so celebración, como siempre, per tolo alto.

Inclusu col 0-2 yeren superiores los visitantes. Marcos Iglesias disparaba abaxu dende fuera l’área pero rechazaba Aitor.

Beni subía a rematar un córner. Caía-y el rechace, poníala cola so pierna mala, y Pablo Martínez, qu’había puestu’l saque d’esquina, remataba cruzáu de volea pero marchaba un metru allueñada del poste.

Les úniques ocasiones llocales al final. Disparu de Christian que rechazaba Davo, o remate de cabeza que diba altu cuando taba solu na frontal del área chica.

Golpe d’efecto del Ciares, que vence nun campu complicáu. Los d’Iñaki Eraña mantiénense na parte noble de la tabla, con visites ya rendíes a campos tan complicaos como Avilés, Mieres o Covadonga. El prósimo ye’l Llanes, otru equipu llamáu a tar arriba. Toca amarrar los puntos de La Cruz. De momentu nun voló nengún.