Esti vienres pela mañana, decretáu día del acompañante pola directiva teyera, visítanos un gran rival, el CD Praviano.

Dambos rivales tamos namás alloñaos por un puntu, 34 pa los brickers por 33 de los de Pravia, segundu y terceru respectivamente. Esti fechu, vien siendo argumentu por que munchos aficionaos de la Tercera falen de “el peor grupu”, o de que “la Tercera asturiana” ta fatal.

El fechu de que dos equipos humildes tean metíos en play-off, cola posibilidá de salir líderes momentaneos al rematar el partíu, nun fai sinón dignificar la Tercer División. La igualdá reinante esta temporada provoca constantes cambeos de líder, y que’l líder namá lleve 4 puntos de ventaya al quintu.

Ye posible que la bipolaridad de la Primer División tea nublándonos la mente. Si nun hai dos equipos que saquen 100 puntos per temporada paez que nun hai nivel. Quiciabes la Federación Asturiana tendría d’inyectar dineru a los equipos más fuertes de la Tercera por que puedan fichar a el xugadores con más potencial de los equipos modestos, creando asina grandes equipos que llogren pasar rondes del play-off.

Falamos de lo mal que ta la Tercera, pero quiciabes tea perbién. Quiciabes anguaño sía de los meyores.

El Pravianu ye un equipu que ta terceru por méritos propios. Magistralmente empobinaos dende’l banquín por Xiel, lleva camín d’ameyorar la temporada pasada, onde acabó namás un puestu percima del Ceares, con 50 puntos. Anguaño puede bater récords.

Grandes xugadores llegaron anguaño. P’amuesa un botón. Guille Méndez, delanteru centru que llegara a debutar en primer división de la mano de Manolo Precido, que llega esta temporada dende’l Racing B. Tamién Moisés, llateral esquierdu procedente del Caudal, o Barto, delanteru, que vien dende’l Navarro.

Gran trayectoria pa los de Xiel hasta agora, que lleven sumaos 13 de los postreros 15 puntos en xuegu. Dase l’interés amás, de que perdió más partíos como local, 2, que como visitante, onde namás collechó una derrota.

El vienres por tantu enfréntense dos equipos, el Ceares, invictu como local, contra’l Pravianu, con namás una derrota como visitante. Dos equipos que se ganaron el derechu a tar ende por méritos propios. Dos equipos que se ganaron l’aplausu.

Dos equipos que converten a la Tercer División asturiana nel meyor de los grupos.