Exitu del “III Alcuentru de Fútbol Popular” y el “Ciares Rock Fest”

L’Alcuentru de Fútbol Popular y el Ciares Rock Fest, actividaes del 70 aniversariu teyeru, fueron unos éxitos en cuantu a participación, organización y diversión.

El fin de selmana pasáu nun había lliga, pero fueron unos de los díes más frenéticos del U.C. Ceares. El Vienres entamaba’ll III Alcuentru de Fútbol Popular, acoyendo a un centenar d’aficionaos llegaos de media España pa compartir les esperiencies xestionando los sos clubes. Una puesta en común que duró tres díes y que sirvió pa deprender unos d’otros, de manera que nun repitamos errores y sí aciertos nos distintos caminos que llevamos hacia un fútbol participativu, inclusivu y sostenible. El nuestr agradecimientu especial pa Nuria Rodríguez, experta universitaria en participación, que col so taller diónos una mirada externa que va valir a tolos clubes pa qu’ameyoremos la xestión tratando d’ampliar la implicación del sociu.

Mientres tenía llugar l’Alcuentru, na nueche del Sábadu tamién disfrutábemos del Ciares Rock Fest. Ana Curra, Lagartija Nick, Dixebra y Peralta formaben el cartel d’algo que yera más qu’un festival de música. Dende hacía meses el club (ye dicir, los socios y les socies) taba preparando esti eventu, y en Los Pericones vióse una gran capaciá d’organización con munchos socios echando una mano, y disfrutando toos d’una velada histórica. Amás agradecemos la collaboración de Divertia, especialmente de Su pola so implicación, a la Conceyalía de Cultura y Festexos, y mención tamién pa los técnicos de soníu que ficieron que’l festival sonara increíblemente (gracies a los vecinos pola paciencia).

Esti veranu de tanta actividá, col Campus de la Escuela Mista nos sos dos turnos, el Pepe Ortiz recibiendo al Atlético de Pinto y la parrillada incluida, el III Alcuentru de Fútbol Popular acoyendo a un centenar de persones, el Ciares Rock Fest, y lo qu’entá ta por venir, ta siendo una demostración de collaboración de los socios y simpatizantes del U.C. Ceares pa sacar alantre tanta actividá, así que’l nuestru agradecimientu y sobre too la nuestra norabona a tolos que tais faciéndolo posible d’una manera desinteresada. Como diz el llema, “70 años faciendo barriu”. Y los que nos queden.