Fúbtol base: nuevu día y nuevu formato

El miércoles ye’l nuevu vienres, siquier no qu’a fútbol base ciarista refierse. Camudamos el formatu de los artículos de la cantera pa poner a un solu clic la información sobre cada unu de los nuesos equipos.

D’equí p’arriba cada miércoles vamos comentar lo que diera de sigo la xornada, pero na parte cimera de la noticia vais tener accesu directu a les últimes resultancies y clasificaciones de tolos equipos que componen la nuesa cantera.

Empezando l’habitual repasada polos más pequenos, tantu Prebenjamín B como Prebenjamín A cayeron derrotaos ante Veriña C y Llanu 2000 B respectivamente, anque los mayores ficiéronlo de forma un tanto inesplicable nun partíu nel que fueron cimeros, y nel que se xugaben tar enriba. A la fin el marcador reflexaba un 4-3 del llau de los locales y eso ye lo que cunta.

Desemeyada suerte la de los benxamines, nuna xornada na que tantu l’A como’l C impusiéronse con claridá a fabriles (14-0) y estudiantes (6-4, con munches ocasiones desperdiciades), pero onde’l Benxamín B espereció ante un bon Montevil qu’acabó goliando.

Nun fueron muncho meyor les coses pa los alevines, que se llevaron una abuitada derrota de manos del Veriña B nun partíu so l’agua y un intensu fríu que tiñazó a los brickers, que nun pudieron da-y al alcuentru la intensidá que riquía.

Tocantes a los mayores, el Ciares Xuvenil impúsose con claridá a casa nel campu del San Llorienzo (0-5), ente que l’equipu filial volvió perder en casa nun partíu bien apostáu nel que probablemente merecieren más, y allóñase peligrosamente de los puestos d’ascensu que tán yá a nueve puntos, anque’l so descansu na primer xornada implica qu’apostaren un partíu menos que los sos rivales na llucha.

Dexámosvos de siguío los horarios pa la próxima xornada, vemosnos polos campos y pistes de Xixón, ¡PUXA CIARES!

[eventlist start=”2014-02-7″ end=”2014-02-10″ limit=10]