[Fútbol Base] Azul oscuro casi negro

Xornada aciar pal Xuvenil que pierde al so porteru Marcel pa les próximes xornaes y déxase tres puntos nun partíu bien polémicu llaráu incidencies.

Y ye que los de Manolo cayen per primer vegada dende fai munches xornaes fora de los puestos d’ascensu, a pesar d’asitiase a un solu puntu del C.D. Deva qu’ocupa la tercer plaza. Tienen qu’enfrentar una salida bien complicada en Xove ante’l Puertu de Xixón C.F., en quinta posición tres los nuesos ya inda con posibilidaes d’engarrar pol ascensu, tou ello ensin cuntar con Marcel na portería por rutura del cuartu metatarsianu.

Empezaben los teyeros adelantrándose nel marcador tres una xugada acabada nun bon remate, pero los visitantes daben el retruque igualando nel marcador tres una falta llateral. Nel segundu tiempu hubo incertidume nel marcador hasta que el discutiniu y les espulsiones rompieron el partíu y dexaronlu en bandexa de plata a los del colexu (1-2).

El filial pela so parte consiguía vencer nel campu de la Unión Ástur (1-3) y asítiase, gracies a la xornada de descansu del Cánicas, a nueve puntos del play-off y con opciones d’engarrar hasta’l final por un ascensu qu’agora mesmu namás puede consiguise a la heroica.

El partíu del alevín de la mañanera del sábadu ante la E.F. Viesques B puede estremase claramente en dos, con un primer tiempu apostáu y competíu nel que los ciaristas diben al descansu con ventaya d’un gol, y una segunda parte na que los de Uribe entartallaron a los locales por aciu un esplegue físicu y de xuegu apolmonante, pa cerrar el partíu con un 2-7 que reflexa la calidá de los visitantes y la superioridá qu’imponen nesta categoría les apaiciones de xugadores de segundu añu ante equipos de debutantes como’l nuesu.

Les derrotes del benxamín A tamién ante la E.F. Viesques (4-0), del bemxamín B ante’l Codema B (2-5) vense un pocu compensaes con la victoria de los más pequenos de la categoría ante’l Llealtá (2-4) en realizando un gran partíu y confirmando que’l polideportivu de la Villa ye un feudu que gusta a los de la teyerona. Tocante a los prebenxamines, derrota de dambos pola mínima ante Veriña C.F. y Xixón Industrial E.

Hora yá de preparar pa la próxima fin de selmana, y pallo dexámosvos colos horarios… ¡PUXA CIARES!

[eventlist start=”2014-02-28″ end=”2014-03-03″ limit=10]