El Miércoles allegábamos al nuesu segundu partíu de pretemporada, primeru fora de casa. El Candás CF convidábanos a la II edición del so Troféu de La Sardina y llegamos dispuestos a traelu pa La Cruz.

El partíu foi’l típicu de pretemporada: muncha llucha, munches imprecisiones y escases llegaes. Na primer parte salimos con esti once: Pablo Díez; Fonso Bellón, Hevia, Aitor Cañedo, Óscar Ruiz; Meana, David, Galache, Rubo, Fran y Pelayo Torre. Una vegada más tratamos de controlar el partíu calteniendo la posesión pero les imprecisiones y la dura presión candasina pusiéronoslo difícil. Na primera parte la emoción foi más bien escasa, si acasu destacaronse un par de llegaes del conxuntu llocal.

Na segunda parte camudamos l’equipu por completu y l’alliniación foi la siguiente: Kike, Martín, Lozano, Rigo, Jorge; Juan Carlos, Pablo Martínez; Borja Argüelles, Rubo, Pelayo Torre y Ponte. En redol al minutu 60 Pablo Martínez retiróse tocáu y nel so llugar tuvo que volver entrar Fonsi, esta vegada ocupando plaza nel mediu campu. L’alcuentru siguió la so monotonía típica de pretemporada, y a partir del minutu 80 llegaron los nuesos meyores momentos, gociando de delles oportunidaes, dalgunes bien clares, pero’l resultau final foi’l 0-0 tan habitual nos primeros partíos veraniegos.

El Troféu decidiose dende’l puntu de penalty, y ende los candasinos fueron más efectivos, imponiéndose por 4-2 y dexando en casa esti II Troféu de La Sardina.

Próximu alcuentru: Sábadu 3 d’Agostu a les 11:00 en Mareo, ante’l R. Sporting de Xixón División d’Honor.