Skip to main content

[L’Entregu 1 – 3 Ciares] ¡Líderes!

Ceares líder por primera vez en su historia

El L’Entregu adelantróse antes del descansu. Dos goles de Borja Noval y unu de Borja Argüelles dieron la vuelta al partíu. Más d’un centenar d’aficionaos ciaristas llevaron a les arandines al equipu. Per primer vegada na nuesa hestoria asitiamos líderes de Tercer División.

Alineación del Ciares en L'Entregu 13/14

L’Entregu 1 – 3 Ceares

L’Entregu: Pablo, Guillermo, Tomás, San Eloy, Javi, Saúl, Álvarez, Paul (Rodrí 70′), Cárcaba, Omar, Damián (Vallina 55′)

Ceares: Kike, Fonso, Lozano (Rigo 93′), Borja Noval, Aitor, Juan Carlos, Pablo Martínez, Borja Argüelles (Fran 92′), Jimmy, Pelayo Torre, Pichón (Meana 56′)

Goles: 1-0: minuto 20, Javi
1-1: minuto 68, Borja Noval
1-2: minuto 71, Borja Noval
1-3: minuto 80, Borja Argüelles

Árbitru: Mata Areces. Amonestó a los locales Omar, Damián, Álvarez y Tomás, y expulsó al porteru Pablo. Argüelles y Lozano fueron amonestaos por parte del Ciares.

Incidencias: Unos 450 espectadores nel Nuevu Nalón, más d’un centenar de gayasperos aficionaos ciaristas.

El Domingu viaxamos a L’Entregu pa visitar a un equipu qu’aspira a tar enriba. Amuesa d’ello ye qu’hasta’l momentu naide había algamao gana-yos na so casa. El partíu empezó con dominiu local, el L’Entregu fízose col control del balón, con gran protagonismu pa dos exciaristas como Álvarez y San Eloy. Sicasí foi’l Ceares el primeru n’intentalo: Juan Carlos llántase delantre del porteru tres una bona combinación, pero Pablo salva’l disparu. A partir d’ende igualáronse les fuerces, inclusive paecía llegar el dominiu visitante. Nel minutu 20, balón a la área ciarista, erru nel estene, el balón queda muertu y Javi, con una guapa volea, asitia’l balón na escuadra ensin que Kike pueda facer nada. 1-0 pa los entreguinos. Partíu d’ida y vuelta d’ende al descansu. Cuando s’averaba’l final de la primer parte, mano a mano que salva Kike, y darréu cabezada de Jairo Cárcaba que Kike llogra estenar sobre la llínea cuando yá se cantaba’l gol. A cinco pal descansu intentábalo Borja Argüelles pero Pablo vuelve responder sobresalientemente. Nueva combinación ciarista, balón al buecu pa Jimmy, el capitán aprovecha’l bote pa faer una vaselina, pero Pablo salva al so equipu de nuevu. Entá hubo tiempu pa otra: internada d’Aitor Cañedo pola esquierda, centru con rosca, Pichón cabecia dende dientro de la área pero’l remate vase alto. Descansu cuando más apertaba’l Ceares, primer parte bien apostada que se lleven los locales pola so meyor puntería.

Tres la frenética primer metá, la segunda prometía. Al poco d’empezar, Pichón abandona’l terrén de xuegu mancáu, entrando nel so llugar Meana. Nacho Cabo ordena a Borja Argüelles asitiase en puntu, daqué que camudaría’l desenvolvimientu del partíu. Nel ’65 doble ocasión, Pelayo Torre remata a espetaperru, pero Pablo unvia a córner salvando una vegada más al so equipu. El córner poner Pablo Martínez bien pasáu, y Borja Noval, asitiáu nel segundu palu, engabita una volea que se cola pol primer palu y alloria a la grada visitante. El Ceares aprovecha’l so gran momentu, y Borja Argüelles a puntu ta de llegar a un bon balón llargu, pero Pablo fízose col balón. Cuando’l porteru yá se fixera col balón, escápase-y incomprensiblemente, Argüelles bien llistu faese con él, y cuando va emburriala a puerta balera’l porteru local gárra-y pola cabeza y bálta-y. Penalty y espulsión que nun almiten dulda. Borja Noval asitia’l balón dispuestu a llograr el so doblete, la grada coria re-mon-ta-da, y el balón acaba na rede de nuevu. 1-2 y el partíu ponse de cara. A partir d’ende’l Ceares fízose col balón y combinó bien aprovechando la so superioridá numbérica ante un L’Entregu que raspiaba’l KO poles circunstancies. Nel ’80 Borja Argüelles empecipia la so enésima arrancada, dribla por dos vegaes, xuega una guapa paré que-y devuelve Pablo Martínez, y yá delantre del porteru, magar ser garráu claramente pol defensa, dispara y robla un gol de bandera y una tarde redonda. Nun hubo más partíu hasta’l final, pero sí tiempu pa la celebración na grada porque llegaben noticies dende Andés y Tiuya: el Ceares asitiábase líder cola derrota de dambos.

67 años y esactamente 500 partíos en Tercer División dempués, la Unión Club Ceares asitiase por primer vegada na so hestoria líder de la categoría. El romanticismu del club ye tal qu’hasta estes coincidencies resulten poétiques.

Próximu partíu: U.C. Ceares – Real Tapia, Sábadu a les 15:45 en La Cruz, Día del Acompañante.

0
    0
    Carrito
    Tu carrito está vacíoVolver a la tienda