L’Entregu – Ciares: viaxe en tropiella

Guardase per bona alcordanza na Teyerona del desplazamientu mientres el pasáu cursu a L´Entregu. L’amabilidá del club al sentar precedente col descuentu nes entraes, del Conceyu, mandando una carta al club convidándonos a asistir, les xentes, y la victoria. Unu de los viaxes más numberosos de la pasada temporada, más de 100 ciaristas tiñeron la grada del Nuevu Nalón de colloráu y azul.

Anguaño, va camín de repitise’l desplazamientu masivu. La Directiva del Club local repite’l xestu. Les entraes pa socios del Ceares van poder a adquirise a namás 6 euros. Los aficionaos teyeros prepararon tol viaxe al detalle, citando a los sos aficionaos na estación de tren pela mañana (12:15) pa convertir el partíu del domingu no que tendría de ser el fútbol de Tercer División: una fiesta.

Pero repitir el 0-2 del pasáu añu nun va ser fácil. L´Entregu, yá gran equipu l’anterior temporada, reforzóse de manera magnífica pa repitir, ya inclusive superar, el séptimu puestu alcanzáu mientres la 2012/13. Fichaxes de caláu pal club de la Cuenca, como Jairo Cárcaba, perfinu media punta xixonés procedente del Caudal de Mieres, San Eloy, mediu centru que tan bon alcordanza dexó na Cruz, Mini, ex Tiuya con gran esperiencia en Tercera, Damián, tamién ex del Caudal, o Tomás, maniegu xugador que compitió nes files de Tiuya o de la Llealtá, por casu.

Un gran bloque, con grandes individualidaes, y perbién dirixíu dende’l banquín por Redondo, el llateral derechu de los años doraos del Sporting, un equipu que trata bien el balón. Magar la so negativa racha, yá que namá sumó 3 puntos de los postreros 15, dende’l club teyero tarrezse enforma’l partíu.

El domingu ye día de fiesta. Ven con nós, ven col Ceares.