[Llangréu 0-1 Ciares] Asaltando Ganzábal

El Ceares ye’l primer equipu en ganar en Ganzábal esta temporada. Un gol de Borja Argüelles al filu del cuartu d’hora foi definitivu. Les ocasiones fueron bien escases y casi siempres visitantes. El planteamientu tácticu de Nacho Cabo afogó’l mediucampu del Llangréu y dio nales al ataque ciarista.

La visita a Ganzábal siempres ye un partíu esperáu. El Llangréu ye l’equipu a bater, esi partíu que’l restu de clubes tán esperando que llegue pa intentar dar la campanada. L’afición ciarista viaxó en masa a La Felguera, siendo más de 200 nes graes y animando ensin parar al conxuntu teyeru yá dende antes d’empezar el partíu. Nel verde la novedá local yera ver a Mendi de central ante les baxes de Nuño y Otero. Per parte teyera, Borja Argüelles ocupaba la posición de delanteru como yá fixera n’Uviéu la selmana anterior.

Antes de cumplise’l primer minutu, Pablo Díaz internose pola banda esquierda, centra a la área, el balón cai-y a Pablo Acebal, y l’estremu xixonés engabítalu de volea con cierta comodidá pero’l so disparu vase alto. A partir d’ende toma y daca, con un Ciares que nun s’echa tras nin tanto. Les acaballaes de Pelayo Torre y Borja Argüelles empiecen a xenerar problemes na zaga llangreana. Al filu del minutu 15, saque de banda na banda esquierda del ataque visitante, tres una bona combinación el balón acaba nos pies de Borja Argüelles na frontera de la área, tira una preciosa paré con Pablo Martínez que-y la devuelve en fondura por que se quede solu ante Guillermo, y Argüelles con un certeru disparu bati a la meta. Llocura na nutridísima grada xixonesa y 0-1 nel marcador. El Llangréu acusó’l golpe y fueron los visitantes quien crearon peligru a la contra, pero ensin concretar. Poco antes del descansu Pelayo Torre regatea un rival, pon-y un pase en fondura a Borja Argüelles, pero cuando ésti disponíase a encarar de nuevu a Guillermo, controla mal y l’ocasión díbase pola llínea de fondu. Descansu en Ganzábal ensin más ocasiones.

Na segunda parte’l Llangréu trató de salir a por toes. Pablo Lago adelantró la defensa hasta mediocampu asumiendo riesgos. Nel ’57 contraataque del Ciares, llega Aitor Cañedo en velocidá y pon un centru al segundu palu onde Borja Argüelles controla, atópase casi mano a mano con Guillermo, dispara daqué escorau, y el meta local fai una gran parada unviando a córner. Poco dempués, nel ’61, falta peligrosa pal Llangréu, llanza Chus percima de la barrera, y Pablo Díez unvia a córner ensin apuros. A la salida del córner Pablo Díaz remata esviáu. El partíu empezaba a volvese broncu y surdíen les primeres engarradielles. Yá cayeren al suelu por duros golpes Juan Carlos o Jimmy per parte visitante, y Calvillo yera’l protagonista polos locales, yá fora recibiendo una bien dura entrada de Lozano (que-y costó la amonestación al central) o encarándose con Jimmy o Pichón. Nel ’75 el mesmu Nacho Calvillo cai al suelu col balón na banda contraria. El xuez de llínea avisa al árbitru qu’espulsa a Pichón por afrella-y. El xixonés retírase del campu ensin apenes protestar pero la tangana enllargase dellos minutos. D’ende a la fin, muncha tensión tanto na grada como nel campu. Magar nun había ocasiones clares, cada xugada yera una batalla y l’árbitru yera protestáu de cutio. Chus tuvo la última ocasión, nun disparu dende la frontera que Pablo Díez atrapó seguru, como mientres tol partíu.

Final en Ganzábal col 0-1 y gran celebración. Nun ye para menos: el Ciares convértise nel únicu equipu que llogró ganar en La Felguera esta temporada y quédase segundu a un solu puntu del líder, que sigue siendo la Unión Popular de Llangréu.

Próximu partíu: Sábadu a les 16:15 en La Cruz, U.C. Ceares – C.D. Covadonga.