Cola xornada de miércoles del primer equipu casi nun tuvimos tiempu d’alendar, y yá tenemos a la nuesa cantera a puntu de saltar nuevamente al campu. Pero como toles selmanes vamos enfrescar la memoria con lo qu’asocedió na xornada anterior, que nuevamente nun dexa más que bones noticies.

Xuveniles

Colegio Inmaculada 2 – 4 U.C. Ceares

Llegó a ponese’l Ciares con tres goles de ventaya, pero una escesiva relaxación asitió’l partíu nun 2-3 con dominiu local. Sicasí los mozos de Manolo tiraron de calter pa sentenciar el partíu y llevase la victoria, que los asitia segundos a dos puntos del líder. El sábadu a les 18:00 partidazu nos campos de la Federación contra’l Puertu de Xixón, tercer clasificáu.

Alevines

E.F. Viesques – Uribe 7 – 2 U.C. Ceares

L’equipu sufrió ante un rival que xugaba prácticamente de memoria y esplegó un meritoriu nivel de xuegu, daqué que sicasí nun evitó que los ciaristas fueren sintiéndose cada vez meyor nel campu y completaren una bona segunda parte, que tuvo bien igualada.

Benxamines

Codema 2 – 3 U.C. Ceares

Partíu d’infartu con victoria nel últimu minutu per parte d’un equipu que lleva cinco victories, que progresa más qu’afechiscamente nel so aprendizaxe, y que ta siendo la revelación del so grupu.

U.C. Ceares B 5 – 5 A.VV. Roces B 

Resultancia xusta nun partíu que tuvo una parte pa cada equipu, hasta’l puntu de que los de Roces igualaron el 5-0 col que fuéramos al descansu na última xugada del partíu. Partíu entreteníu, emocionante y disputau.

Codema B 6 – 3 U.C. Ceares C

A pesar de dir ameyorando xornada a xornada, los erros defensivos siguen costándo-y munchos goles al benxamín C. Los contraataques del Codema fueron letales nel tramu final del partíu. Hai que siguir trabayando.

Prebenxamines

U.C. Ceares 7 – 2 La Braña C

Apoderaron los guah.es el partíu de principiu a fin, y certifiquen la so llínea ascendente demostrando que tán aprendiendo enforma.

A.VV. Roces B 15 – 1 U.C. Ceares B

No que fai a los más pequenos siempres asocede igual, les resultancies tan abuitaes escuenden qu’acaldía van ameyorando y que yá se ven coses frutu del trabayu de la selmana. Norabona y suerte pal próximu.

Como siempres, lo más importante d’esta xornada y de la qu’empieza mañana ye que los nuesos chavales prestáronse practicando deporte y fixéronnos emocionanos col fútbol más puru qu’esiste.

Vemosnos nes pistes y campos de Xixón, ¡PUXA CIARES!

Horarios:

[eventlist start=”2013-10-30″ end=”2013-11-6″ limit=10]