Nueva victoria y sigue el suañu

Qu’en los 67 años d’hestoria del club nunca se viera un entamu ligueru paecencia dizlo tou. El Domingu visitábanos el segundu clasificáu, l’Atléticu Llugones, y los de Nacho Cabo impusiéronse con autoridá por 2-0 con goles de Ponte y Rubo. Asitiamos en tercer posición na tabla, 8 puntos percima del descensu.

Por una vegada lo más importante del partíu foi antes del pitíu inicial. Unos 50 trabayadores de Monroe allegaronse a La Cruz pa facer pública la so situación de desamparu ante’l zarru de la so empresa. Con una pancarta pidiendo la continuidá de la producción en Xixón, saltaron al campu acompañando a los xugadores, quien tamién llucieron una camiseta de sofitu a esta xusta causa. La Cruz tampoco duldó n’amosar el so sofitu.

Tres el pitíu inicial el Ceares salió como siempres, col enfotu de apoderar el partíu, con un xuegu asociativu, pero ensin arrenunciar a la velocidá nos posibles contraataques. Pichón tuvo la primer ocasión, y nuna galopiada tres un pase ente llínees de Meana, llantóse delantre de Jorge, pero’l porteru del Llugones amosó unos grandes reflexos unviando’l balón a córner. La presión ciarista siguió, con bones combinaciones que daben sensación de peligru pero que nun yeren remataes. El Llugones trataba de solmenase’l dominiu, pero’l so bagaxe nesta primer parte llindábase a balones paraos a l’área. Cuando la grada ciarista paecía resignada a dise al descansu ensin ver la so superioridá reflexada, volvió apaecer Borja Argüelles, esta vegada a banda camudada, y en conduciendo’l balón punxo un centru perfectu cola so pierna esquierda qu’Álvaro Ponte cabeciaba picáu a la rede. Xugada preciosa que Ponte y el restu del equipu celebraba abrazándose col numberosu y ruidosu fondu sur de La Cruz. Darréu l’árbitru decretaba’l final de la primer parte.

Tres el descansu la dinámica apenes varió. La frustración del Llugones ante’l xuegu de pase del Ceares yera visible, y Fidalgo y Rodri solmenaben dos dures pataes casi consecutives tres los caracoleos de Pelayo Torre y Borja Argüelles. El conxuntu visitante rebulliose al filu de l’hora de xuegu, teniendo la ocasión más clara nun disparu dende la frontera l’area de Imaz que foi bien centráu y atayó Kike seguru. Nel minutu 55 Pablo Martínez entraba nel llugar de Ponte, pasando Pichón a descolgase en llabores más ofensivos. El Ceares aprovechó’l cambéu pa dedicase a defender teniendo balón nos sos pies, y les triangulaciones nel centru del campu recibíen l’aplausu del públicu. Juan Carlos y Meana nun duldaron en xugar balones al llombu d’una defensa bien adelantrada poles circunstancies. N’unu d’esos balones Pablo Martínez llantose na área, el so disparu cruzáu superó al porteru, pero un defensa salvó so palos. Nel tramu final saltaron al riolo dos delanteros, Rubo y Fran Oliveira, ocupando los puestos de Meana y Borja Argüelles. Los dos nuevos puntes salieron con ganes de rematar el partíu. Primero foi Juan Carlos quien s’escapó y buscó el pase de la muerte pa Rubo, pero’l porteru visitante salvó. Finalmente, un nuevu pase ente llínees atopó la carrera de Fran Oliveira, quien yá dientro de la área venció generosamente a Rubo por que marcara el 2-0. Final del partíu y tres punto más que nos alloñen yá a 8 del descensu y déxennos en tercer posición.

El suañu sigue una selmana más. Confiamos en qu’el de el trabayadores de Monroe tamién.

Próximu partíu: Domingo a les 17:30 en Les Caleyes (Villaviciosa) ante’l CD Llealtá.