Tarde de domingu, y unu de los últimos colosos que-y queden por xubir a la Unión Club Ceares na so llucha pol play-off: El Club Deportivu Tiuya.

Como bien dicía’l nuesu capitán Jimmy nel programa radiofónicu Bombialu, el Tiuya ye un equipu diseñáu pa ganar el títulu. Grandes xugadores en toles llínees, dende la portería hasta la vanguardia. A pesar de ganar la pasada lliga, l’equipu dinamiteru supo reforzase enforma y bien esta campaña. Nomes como los de Diego Arias, Miguel Cedrón, el nuesu Jorge Vázquez, Jandro, Cueva, o Miguel Suárez, llegaron esta temporada al Candín a cerrar una plantiya redonda.

Magar lo gris de la so temporada, anguaño octavos con 50 puntos, el conxuntu arlequinau ye unu de los meyores equipos como local, onde consiguió la friolera de 13 victories. Amola-yos la temporada’l so raquíticu rexistru a casa, onde namás consiguieron 2. Ye pos, un equipu tarrecible como local.

El campu del Candín, ye especialmente conocíu polo escaso de les sos midíes. D’ende la importancia d’un xugador enriba como ye’l casu de Miguel nos locales. Muncha segunda xugada, y probablemente poca ellaboración verá mañana.

Espérase desplazamientu masivu pola afición teyera. La primera de les 7 finales que tenemos per delantre, y unu d’esos partíos onde puede ganase enforma y perder pocu. Un partíu que puede danos el play-off, o inclusive, quién sabe, el títulu.