Tarrecíase esti partíu en Los Pericones. Bon rival, anque somorguiáu nuna irregular temporada y demasiaes baxes nel equipu con xugadores importantes fora de la convocatoria por sanción, como’l capitán Jimmy, y dos de los centrales, Borja Noval y Rigo.

La baxa de Borja Noval foi cubierta por Aitor Cañedo, que, yá que sal, cuayó un gran partíu, siendo probablemente’l meyor xugador teyeru nesti mañaneru dominical. La defensa tuvo a gran nivel y nun foi’l principal problema ciarista. La baxa de Jimmy sí se notó. Faltaba esa referencia ente llínees.

Los brickers trataron de combinar ente llínees. Pero nun taba’l media punta, nun taba’l que se remana per esos terrenes al so antoxu. Fundamental el so xuegu nesti sistema. Intentábenlo los ciaristas, pero con demasiaes perdes en mediu campu, demasiaos pases mal executaos, y la resultancia ye que nun llegaben enriba.

La primer parte pasó ensin pena nin gloria pa dambos equipos. Más directu’l xuegu universitariu y más llegaes, pero pocu peligru. Dambos equipos engarraben en mediu campu, pero nun se creaben ocasiones. Los uvieinos llegaron a la área delles vegaes, pero los sos disparos nun coyeren puerta. Per parte teyera, l’únicu disparu ente palos corrió por cuenta de Pichón cola so pierna esquierda. Al refugue llegó Ponte, pero nun pudo resolver. Terminaba la primer parte cola sensación de que nengún de los dos equipos sufría demasiáu, partíu con pronósticu d’empate a cero.

La segunda parte empezó distinta. El Universidá adelantró la presión y robaba demasiaos balones. Erros na salida del xuegu teyeros yeren aprovechaos polos uvieinos. El primer avisu diolu Villa. Internose por banda esquierda, y punxo el centru perfectu pero nun llegaron a rematar los sos compañeros y el balón pasió frente a Kike.

Frutu d’una nueva perda sacando’l balón llegó’l gol local. Inoportuna zapicada de Juan Carlos, Llerandi roba, llántase na frontera y dispara al palu curtiu. Y con el partíu amorrentando.

Los meyores minutos cearistas llegaron tres el gol local. Primero Galache punxo un balón cola maniega al que nun pudo llegar Rubo y Fonso trió área dende banda derecha dos veces pero los sos centros nun atoparon rematador. Pela so parte, Aitor Cañedo salvó un trés pa unu que podía sentenciar el partíu. Primero adelantróse intelixentemente pa dexar en fora de xuegu a los dos acompañantes y darréu robó l’esféricu cuando nun los dexó más remediu qu’encaralu.

El Ciares morrió lluchando con una falta botada dende mediocampu por Pablo Martínez. Pero nun pudo ser y los trés puntos quedaronse nel Estadiu Universitariu. La victoria nel derbi antóxase vital. El Ceares precisa sumar los trés puntos ante’l Xixón Industrial. La Cruz va vivir una fiesta, la fiesta del fútbol xixonés.