[Xixón F.F. 1-3 A.F. Racing] Otra vegada ensin premiu
Partìu de poder a poder nos Campos Federativos de Roces, nel que nuevamente’l marcador-y da la espalda a un Xixón F. Femenín que mereció más y qu’enzarró al A.F. Racing na so área en delles fases del alcuentru.
Y ye qu’a los pocos minutos d’entamar l’alcuentru, Lydia Vela abría les hostilidaes con una internada pela banda derecha, cruzando’l balón al centru l’área pa la llegada de Carla, que recibe un coldazu nel rostru por parte d’una defensora que nin colexáu nin asistentes acertaron a ver. Seguía l’acosu y unos minutos más tarde yera la guardameta cántabra Sara Noriega la que salvaba al so equipu con una impresionante intervención a disparu dende la frontal de Lydia, que se confirma como un de los baluartes ofensivos de les xixoneses.
Xixón F.F. 1 – 3 A.F. Racing
Xixón F.F.: Lorena, Ivana (Raquel 55′),Tifi, Paula (Aida 66′), Trevi, Lydia, Maribel, Mayra, Zara, Laura (Gema 45′) y Carla (Nani 69′)
A.F. Rácing: Sara, Laura, Marta, May (Angela 60′), Athenea, Patri, Sofia (Paula 78′),Silvia, Irene (Andrea 88′), Rebeca (Sheila 85′), Vera
Goles:
1-0: Paula 23′
1-1: Patri28′
1-2 Silvia 53′
1-3 Silvia 74′
Árbitru: Menendez Riestra. Poles llicales amonestó a Gema (52′), Maribel (63′), Tifi (81′) y espulsó al delegáu de campu Diego, por non lu acompañar hasta los vestuarios a la conclusión del alcuentru. Pol Racing, amonestó a Marta (73′)
Incidencies: Unos 100 espectadores nos Campos de la Federación de Roces. Presencia de seguidor@s Racinguistes. La llocal Maribel tuvo de ser retirada en camilla del terrenu de xuegu debíu a un golpe fuerte.
Corría’l minutu ventitrés cuando nuna disputa dientro l’área racinguista acababa con un balón al palu cuyu rechace aprovechaba Paula pa poner l’uno a cero nel marcador. De nuevu encalzaba bien l’alcuentru’l Xixón, pero de nuevu como n’ocasiones anteriores diba dura-yos poco la ventaxa.
Concretamente, dos minutos, ya qu’enseguida Patricia Cano ponía la igualada nel marcador con un buen testarazu, al que respondería Zara con un gran llanzamientu de falta que marchaba raspiando’l poste, y que daba pasu al descansu.
La segunda parte comenzaba con un Fenix más volcáu, intentando presionar la salida del balón del Xixón, que sin embargu conseguía zafase y sacar el balón xugáu. Non obstante diben ser les cántabres les que se poníen per delantre nel marcador, nuevamente a balón paráu y gracies a una gran xugada d’estratexa. Silvia Martínez anunciaba la so intención de ser decisiva nel alcuentru.
Sucesión d’acercamientos y oportunidaes ensin culminar pa que, cuando se llegaba al ecuador de la segunda parte, produciérase una xugada un tantu sorrealista na que Lorena, col balón yá en so poder, refuga cola mano l’acción de la delantera racinguista dexándo-y la pierna. Esta vase al suelu y el colexáu decreta penalti. Estupefacción xeneral y l’uno a tres qu’unviaba Silvia al marcador, dexando’l partíu mui cuesta arriba.
D’ehí al final, puxu, corazón y un par d’acercamientos culminaos por Raquel y Lydia que nun algamaron l’oxetivu. Quitando’l duelu col Sporting, Roces nun ta trayendo-y suerte al Xixón F. Femenín.
En trenta díes espera l’antiguu Orzán, güei Real Club Deportivo de La Coruña, dempués de l’acuerdu ente ambos clubes.