[Xixón F.F. 3-2 C.D. Monte] Montaña rusa d’emociones

El Gol de Tifi

El Xixón Femenín impónse al Monte nel últimu minutu del descuentu y dexa prácticamente cerrada la permanencia na segunda división del fútbol femenín nacional.

El Gol de Tifi
Panorámica del gol de la victoria | Fotos originales de Menchu Vigil

Prevíase un partíu tensu y asina foi. Llegaben les llocales al alcuentru con una renta de tres puntos sobre’l descensu y con la oportunidá de dar un golpe d’efectu na clasificación imponiéndose al Monte. L’equipu del barriu santanderín del mesmu nome atesora una plantiya con tanto talentu como mocedá. Foi de menos a mas esta temporada, pagando agora na clasificación un aniciu de temporada non demasiao positivu en cuanto a resultaos.

Xixón F.F. 3 – 2 Monte

Xixón F.F.: Vanesa De Pedro, Maribel, Ana Simón, Tifi, Raquel (Lydia Vela 64′), Aida, Carla (Laura 78′), Gema, Trevi, Marina, Zara (Paula 86′)

Monte: Gema Herranz (Claudia 46′), Moni, Lara, Paula, Saza, Pili, Jime, Ali (Eva 46′), Menchu, Mar, Laura (Cristina 46′)

Goles:
1-0 Gema 37′
2-0 Aida 44′
2-1 Paula 51′
2-2 Paula 80′ (P)
3-2 Tifi 94′

Árbitru: Bermejo Ferrero. Amonestó a Tifi, Diego (delegáu) y espulsó por doble amonestación al técnicu llocal, Luengo. Amonestó a Mónica y Saza pol C.D. Monte, y al técnicu visitante Manuel Gestera.

Incidencies: Unos 100 espectadores nel campu númberu 2 de Roces, con bayurosa presencia de siguidores cántabres.

Dende llueu esi ímpetu xuvenil dexáronlu ver les xugadores del Monte nos primeros compases del alcuentru, onde achucharon a les xixonesas hasta’l puntu de forzar a Vanesa De Pedro a realizar tres intervenciones de méritu. Salíen poco les llocales, pero cuando lo facíen conseguíen xenerar peligru, polo que’l partíu resultaba entreteníu más allá de la emoción polo decisivu del mesmu, palpable ente’l públicu que poblaba la grada del Campu Federativu Nº 2 de Roces.

Sicasí, el partíu diba romper de la manera más inesperada. Nuna xugada de saque de banda ensin aparente relevancia, Moni, la númberu 3 del Monte, diríxese al árbitru nunos términos qu’esti entiende como inapropiaos, polo qu’aplica la normativa nueva pola que les protestes sanciónense con llibre indirectu nel llugar de la infracción. Toque’n curtio pa Gema y zambombazu a puerta ente’l que nada puede facer la otra Gema, portera visitante, que nun tien más remediu que recoyer el balón del fondu’l marcu.

Y cuando tol mundu daba por buenu l’ún a cero pa dir al descansu, una internada pela banda izquierda de la defensa cántabra finaliza nun centru rasu al qu’Aida responde con un toque sutil d’esterior al palu llargu que ponía una renta de dos a cero nel marcador y un poco de tranquilidá ente’l públicu llocal, o eso al menos se comentaba nos corrillos demientres el descansu, non sin recordatorios de prudencia per parte d’algunes.

Taben no cierto. Triple cambeu nel conxuntu santanderín. Salieron a vaciase les cántabres, con too, y durante los primeros minutos del segundu tiempu foi un monólogu suyu. Nun de los múltiples acercamientos al área l’árbitru decreta una falta más o menos na mesma posición que la que dio orixe al ún a cero. Sería Paula Lavín, llanzadora habitual a balón paráu de les santanderines la encargada de golpear a puerta, cosa que fizo con muncha fuercia pero escasa colocación. L’Adidas Errejota volaba escontra Vanesa, que nu yera a contactar de manera correcta colos puños, quizá por tar tapada o por dalgún estrañu nel recorríu del esféricu, y el so despexe sal nuna diagonal hacia atrás qu’acaba nel fondu les malles. Tocaba reponese del golpe y sacudir los nervios.

Yera imposible que’l Monte pudiera caltener esi ritmo y si bien seguíen dominando, poco a poco fueron igualandose les coses nel prau. Llegaba pelo alto y en balones a la espalda que solventaba con seguridá la zaga y guardameta teyeras. Nesi trabayu taben cuando nun balón sueltu a puntu de ser rematáu por una ariete montesa apaez Trevi pa interponese, ganar la posición, recibir la patada que diba destinada al balón, y cometer penalti a criteriu del colexáu. Un tanto inesplicable vistu dende la grada, pero quizá dende la so posición concluye que Trevi arrolló a la delantera cántabra. Volvía ser el turnu de Paula Lavín, que nuevanente conseguía l’oxetivu con un disparu potente que se colaba pel centru de la portería. Corría’l minutu ochenta de partíu.
Igualada nel marcador y nervios que se treslladaben tamién al Monte, yá con daqué que perder, y ensin tener mui claro si conformase col empate o dir pola victoria. Muncha tensión y dalgunos acercamientos ensin munchu peligru hasta un buen disparu que desvía Gema Herranz a corner.

Cruces de dedos, “venga venga” y “por favor, por favor” nes graes mientres l’esféricu vuela al centru l’área del Monte. Hai un rechace, el balón queda sueltu y dende la distancia vese un destellu coloráu y azul que lu manda al fondu la rede. Más tarde sabremos que lleva’l 4 a la espalda. Esplosión en prau y fuera d’él. Épicu.

Al Monte solo-y quedaba intentar el gol tirando dende mediu campu y l’arguyu de tener decho un gran partíu. Van tener que siguir peleando. Pa’l Xixón F. Femenín, el premiu de tener la permanencia al alcance de la mano, podía dase inclusu de forma automática a raíz d’otros resultaos, de ver la recompensa a tol esfuerzu y trabatu d’un añu materializáu nun instante d’esos que ponen los pelos de punta, de los que faen querer al fútbol.

Nel imaxinariu de los aficionaos al Xixón F. Femenín llegaos de la integración col Ciares, seguramente qu’esti va ser recordáu como’l gol de Tifi. Imposible nun trazar paralelismos. Y te que les grandes capitanes siempre apaecen nel momentu precisu.

Deporte Asturiano
Ayuntamientu de Xixón

Ellaces d'interés
Enlaces de interés


Contautu
Contacto


Por TLF: L-V 16:30 a 21:00
La Cruz: X de 19:30 a 21:30

Tienda: +34 636 517 376
Secretaría: +34 637 521 674
Prensa: +34 646 862 239
Sec. Técnica: +34 646 862 239
F. Femenino: +34 635 899 370
F. Base: +34 618 149 800
F. Sala: +34 627 534 266

Copyright ©2018 Unión Club Ceares