[Astur 1-4 Ciares] El Ciares vuelve por navidá

El Ciares vence con goleada y gran fútbol al Astur, comienza l’añu con contundencia y retoma la imaxen anterior al bache de resultaos.

El Ciares del Hermanos Llana recordaba al de Colunga. Munchu toque, xuegu rápidu, y llegaes sin parar al área contraria. De fechu, amosó tal superioridá güei n’Uviéu que resulta difícil creer la racha.

Bastantes novedaes nel once inicial. Miguel yera l’encargáu de sustituir al sancionáu Beni, al que castigaben por cuatro partíos tres del so alcontronazu nel partíu frente al Marinu. César entraba por Juan Carlos nel centru’l campu. En bandes, en llugar de Cris y Natan, consideraos como xugadores eléctricos, Hevia y Chus Naves, xugadores más de toque. Tamién volvía l’esperáu Álvaro Ponte a la convocatoria.

Y ye que’l Ciares arrancó prontu. Sólu se teníen disputaos 12 minutos cuando Chus Naves s’estrenaba como goleador al cabecear un córner. Poníase’l partíu de cara bien llueu.

Rubo y Marcos Iglesias demostraron llevar munchu peligru xuntos. Nuna de les múltiples combinaciones ente ellos surdió la meyor ocasión de la primer parte. Balón de Marcos pa Rubo, que trata de definir per baxu ante’l porteru, pero’l cancerberu llocal despexa’l llanzamientu, y dempués bloca’l balón, que quedara muertu.

Gran Davo na única ocasión llocal. Buen balón a la espalda de Chery, pero Davo salva’l mano a mano. Nel rechace, tapa Miguel cuando quedara la la portería desguarnecía.

Nos últimos minutos, llegó lo meyor del Ciares, que llanzó hasta cuatro córners de manera consecutiva. Les más clares, pa Rubo ambes, con disparos que rechazaba’l cancerberu llocal con apuros. La más guapa, pa Fonso, que tres d’una gran combinación n’ataque, taconazu incluyíu, nun ye quien a definir cuando se plantaba frente al porteru.

Prontu sentenciaba’l Ciares. Gran balón ente llínies pa Marcos Iglesias, que definía con muncha clase, interior del pie y arriba. Pocu dempués mataba’l partíu. Recoyía Marcos un centru de Pablo Martínez y fusilaba per baxo. Sólu diben 55 minutos, pero’l partíu quedaba minimizáu pola superioridá visitante.

Y ye qu’esos minutos amosaron a los meyor (güei) celestes de la campaña. Xuegu, toque, y contundencia arriba. Marcos Iglesias y Rubo llimpiaron de polvu los palos, con grandes disparos que marchaben rozándolos.

La puntina yera pa Juan Carlos, qu’entrara sustituyendo a Pablo Martínez pocu enantes. Xugada ente Marcos Iglesias y él. Centra’l 9 y remata durísimu arriba, imparable.

La gran noticia pal Ciares llegaba a 10 minutos del final. Hugo saltaba al prau sustituyendo a Chus Naves, y se convertía nel primer xugador xuvenil en debutar col primer equipu. Noticia d’alcance pa la familia ciarista.

Pa lo cabero, llegaba’l gol del honor pa los llocales, que se ven sumíos en problemes na tabla.

Agora toca derbi, toca’l Xixón Industrial. Los de Xove lleguen tocaos, los de Los Pericones aumenten los sos niveles de moral. El partíu promete tensión, seguramente nun-y falte. Ún de los partíos siempre marcaos nel calendariu. Veremos qué depara