[Avilés B 1-1 Ciares] Marcador curtiu, partíu rellumante
El Ciares foi cimeru al Avilés B y espachó un gran partíu, pero namás pudo sumar un puntu tres un polémicu final.
Teníense ganes de volver al Suárez Puerta. Gran estadiu y gran equipu esperaben. El descansu esta xornada del primer equipu del Avilés armaba hasta los dientes al so filial. Un equipu nuevu, con toque de balón, velocidá, y verticalidá.
Avilés B 1 – 1 Ciares
Avilés B: José Luis, Héctor, Roni, Borja Granda, Hugo Sánchez, Samu, Josín, Omar (Raúl 64′), Juan Menéndez (Chini 64′), Wisi (Adrián 89′) y Cristian
Ciares: Pablo Díez, Fonso Bellón, Lozano, Rigo, Pichón, Meana (Fran Dos Santos 50′, Montequín 90′), Pablo Martínez, Jimmy (Aitor 81′), Pelayo Torre, Juan Carlos y Borja Noval
Goles:0-1: Pablo Martínez 73′
1-1: Cristian (P) 79′
Árbitru: Marinero Noval (Oviedo). Amonestó polos locales a Cristian y a Borja Granda y pol Ciares expulsó con collorada direuta a Lozano y sacó-y mariella a Rigo.
Incidencies: Alcuentru correspondiente a la vigésimo octava xornada de Tercera División disputau nel Suárez Puerta ante 263 espectadores, 75 ciaristas. Terren de xuegu n’aceptables condiciones.
Pero namás mientres 10 minutos viose a esi Avilés B que tanto se tarrecía. Dos llanzamientos a puerta de Wisi, unu que llanza demasiáu cruzáu, y una falta qu’estena Pablo Díez ye tol bagaxe local na primer parte.
A partir d’ende, el balón foi teyeru. Y el Ceares demostró’l porqué de la so posición na tabla. L’equipu combinó, tocó, y dio un auténticu espectáculu de la mano de dos mediocentros, Juan Carlos y Pablo Martínez, estelares. El Ceares llanzaba parés per dientro, esperaben el desmarque de rotura de Pichón, o aguantaben el balón hasta la xubida de los llaterales. Y una vegada tres otra, una tres otra.
Unu. Dos. Trés. Cuatro. Córners consecutivos pal Ciares. Al palu curtiu, pasáu, “gilicórner”, y nel cuartu remate de Pichón, y paradón espectacular del porteru local. Yá se diba viendo quién diba mandar nel partíu.
El retruque a la parada local, púnsolu Pablo nun vuelu a la so escuadra esquierda. El filial blanquiazul nun tenía’l balón, pero llegaba con peligru.
Llegábase al descansu cola sensación de tar viendo un gran partíu, y que la victoria podía cayer pa cualquier llau.
La segunda parte foi colorada. Juan Carlos fíxose grande, Juan Carlos crecióse, Juan Carlos maravió.
Los avilesinos viéronse incapaces de quita-y el balón al Ciares. Los brickers espacharon unos de los meyores cuarenta y cinco minutos de la temporada. Los peligrosos puntes del Avilés yeren incapaces de recibir el balón.
La más clara entamola, qué tanto, Juan Carlos. Roba, combina nel mediu y mete el balón penriba sobra la xubida de Borja Noval. El llateral ponla nel puntu de penalti pa un Fran Do Santos solu, que nun llogra contactar bien col balón cuando tenía tou a favor.
Tardó en llegar el gol pa los méritos visitantes. Gran xugada de Pichón que ye baltáu na frontera de la área. La falta paecía que fuera cometída nel sitiu onde Pablo Martínez querdría. Frontal del diestru. Un par de metros fuera de la área. La falta perfecta pa Pablo. Pablo executa la falta al sabor de la boca. Golazu del finu mediocentro. Tocadina percima la barrera, el balón llimpia de telarañes la escuadra. Gol de bandera nun campu de bandera.
Quedaba poco tiempu y el partíu tenía color visitante. Pasaben los minutos y el Ceares nun sufría, a pesar de tar por detrás nel marcador, l’Avilés nun creaba peligru.
Pero surdió’l famosu convidáu de piedra. Pablo Díez refuga un disparu, Lozano y Cristian busquen el refugue, llega primeru Pablo al balón, depués cai Cristian. El linier nun ve nada. L’árbitru, peor asitiáu, pita penalti. Collorada pa Lozano. El central bricker nun da creitu. Cristian llanza’l penalti y Pablo casi la para, pero’l so estene cólase.
Con empate nel marcador, y un xugador menos, tarrecíase pol partíu. Pero nesos diez minutos, el Ciares demostró quién yera’l meyor ayeri. El Ciares con un xugador menos tamién apoderó. El Ciares rellumó.