[Ceares 1-0 Tuilla] El campeón cae en La Cruz

Prolegómenos intensos en La Cruz ante unu 500 asistentes: Jorge Vázquez, güei rival, recibía’l “II Troféu Jimmy Greaves” que-y acredita a lo más goliador del club la pasada temporada, ente que’l capitán Jimmy recibía’l “II Troféu George Best” como meyor xugador de la temporada anterior (según votación popular). Amás, el boxeador local Pablo Fuego faía’l saque d’honor, promocionando la velada del 22 de Noviembre na que se va convertir nel primera púgil profesional del barriu.

Tres los prolegómenos, una vegada más el Ceares saltaba al campu con novedaes: Rigo ocupaba’l llateral derechu nel que ye habitual Fonso Bellón, y Pichón y Meana cayeren del once, ocupando’l doble pivós Juan Carlos y Pablo Martínez. Dende’l primer minutu l’equipu salió entornáu a pola victoria, fieles al estilu de xuegu de Nacho Cabo. A pesar del dominiu y de frecuentar la área visitante, les ocasiones tardaron en llegar. Pasáu’l minutu ’20 Jimmy dispara dende fora de la área pero vase alto. Da’l retruque’l exciarista Jorge Vázquez, que s’escapa de la defensa, retaya escontra dientro y dispara con muncha intención al palu llargu, pero Kike espurrese y llogra refugar un gol que casi cantaba la nutrida parroquia dinamitera. Poco dempués vuelve intentalo’l capitán ciarista, pero Vilches vuelve esbaratar l’intentu. Al filu del descansu Óscar Ruiz pon un balón a la área que s’envelena, Vilches refuga, el balón cai-y dientro de la área a Lozano quien remata por dos veces pero nun llogra bater al porteru. Descansu en La Cruz.

La segunda parte empezó de manera frenética. Pablo Martínez pon un balón en fondura pa Juan Carlos qu’entra dende segunda llínea pel estremu esquierdu, el mediocampista xixonés encara la área buscando portería, frénase intelixentemente esperando la llegada de dalgún compañeru y pon un gran pase al segundu palu por que Borja Argüelles emburrie’l balón a la rede roblando una preciosa xugada colectiva. A partir d’entós el Tiuya llanzóse más al ataque y trató de romper la presión ciarista. Nel ’58 Juan Cueva entra na área, dispara duru embaxo, Kike refuga como puede, y cuando se cantaba’l gol de Jorge Vázquez, ente Lozano y Borja Noval llogren unviar el balón percima del llargueru.

L’equipu y la grada celebraronlo como si fuera un gol. El Ceares buscaba sentenciar a la contra pero nun llograba rematar, ente que los visitantes vivíen los sos meyores momentos. Esteban llanza un llibre directu dende la frontera, pero Kike vuelve llucise con una estene a una mano espectacular. Averábase’l final del alcuentru y el Tiuya entornábase, agora yá con más corazón que cabeza, pero la zaga ciarista estenaba con seguridá los balones colgaos. Nos últimos minutos Pablo Martínez prime a la defensa dinamitera que dexa’l balón a Vilches, el porteru confíase y el so estene estrellar nel mediocampista xixonés y a puntu ta de significar el 0-2. Final del partíu pa felicidá de la grada local, que mientres tola segunda parte foi como un defensa más na portería del fondu sur de La Cruz.

Rematada la xornada 13 asitiamos na 3ª posición, 20 puntos percima del descensu, 5 percima del 5º y a unu del líder.

Próximu partíu: Domingo a les 16:30 en Nuevu Nalón, L’Entregu CF – UC Ceares. Entrada antemanada pa socios ciaristas 6€ (pueden adquirise dende yá mesmu nel chigre de La Cruz).