[Ciares 1 – 0 Sieru] Rafa allarga l’alegría en La Cruz

Un gol del centrocampista xixonés al empiezu de la segunda metá firma’l trunfu sobre’l Siero del Ciares, qu’enllaza nueve xornades ensin derrotes.

Un gran gol de Rafa al empiezu de la segunda parte dio la victoria (1-0) al Ciares ente’l Siero y prolongó la racha de nueve xornaes ensin conocer la derrota. El trunfu lforxólu’l conxunto dirixíu por Nacho Cabo a base de constancia frente a un adversariu que, anque con un bagaxe ofensivu escasu, nun baxó los brazos hasta’l pitíu final. Con dalguna rotación na alliniación a cuenta de les apretures del calendariu que lu lleven a apostar tres alcuentros en malpenes siete díes, el cuadru teyeru llevó la iniciativa dende’l primer minutu y nel segundu yá pudo estrenar el marcador. Trubi refugó na mesma llínia de gol un testarazu de Natán y nel saque d’esquina posterior el remate de Javi Gutiérrez marchó rozando’l poste. L’ímpetu del Ciares llevólu a xenerar una nueva ocasión recién superaos los diez minutos de xuegu con un remate de Rafa dende’l borde del área, pero’l disparu tampoco llogró dirixise ente los tres palos. El Siero basaba’l xuego d’taque na velocidá d’Álex y el poderíu físicu del so ariete Saha, al que la zaga frenaba con aciertu. Volvieron a la carga los xixoneses nuna buena aición de Javi Gutiérez, qu’asistió a Juanín, encargáu de finalizar l’aición con un disparu al llateral de la rede. Foi la última escaramuza ofensiva nel primer períodu d’un conxunto xixonés que fue de más a menos nel so caudal ofensivu, anováu tres del descansu. El primer avisu llegó nun remate de Juanín que Río desvió a córner. Nel saque d’esquina llegó la recompensa a la superioridá. El balón colgáu al segundu palu recoyólu Josín, que lu mandó al corazón del área, onde Rafa conectó ente una maraña de xugadores un derechazu directu a la escuadra. El gol recibíu fizo estirase al Siero, que sumaba más efectivos a les sos aiciones d’ataque. Tres d’un remate de Rafa que tuvo a puntu de sorprender a Jano, el duelu entró nuna fase más embarullada, inclusu bronca, con una actuación arbitral que desquició a dambos equipos. Yá na recta final, pudo doblar la ventaya llocal Yoni, que marchó del so par y encaró a Jano, que refugó’l cueru dende’l suelu colos pies. Col choque agonizando, una falta llanzada por Juanín coló rozando la escuadra y tuvo a piques de xunise al gol solitariu de Rafa, abondo pa que’l Ciares se consolide na parte alta enantes de visitar esti miércoles el Nuevu Nalón pa enfrentarse a L’Entregu.