[Ciares 1-0 Urraca] Brindis del Ciares
Arrinca la temporada 2014/2015 pal Ciares, y failo de la meyor manera posible, con victoria. El Ciares caltien l’esquema técnicu de la pasada campaña. Kike na portería, en llínea de cuatro asitiábense Pablo Prendes, Lozano, Beni, y Aitor. Juan Carlos y Jorge Vázquez yeren los encargaos de distribuyir el fútbol. La llínea de media punta pa tres puñales, Chery pola esquierda, Raúl pola derecha, y Pichón nel mediu. Enriba Ponte.
A pesar de lo prematuro del partíu, tresmitía bones sensaciones l’equipu teyeru. Bien seguros tras, y el balón pembaxo. El balón pasa una y otra vez por Juan Carlos, que con criteriu lo distribúi. El Ciares apunta maneres. Los dos primeres llegaes fueron locales. Primero gran internada de Chery per banda esquierda, intérnase na área, pero el so centru atrápalu Iván. Dempués Ponte a puntu tuvo de llegar a un balón que lu dexaba llibre de marca, pero nun llegaba ante Iván.
Trescurría la primer parte ensin grandes ocasiones. El Urraca foi soltándose’l dominiu y adulces empezó a controlar el balón, pero ensin fondura. Al descansu, primer movimientu tácticu de Miguelín. Jorge Vázquez dexaba’l campu, y entraba nel so llugar Cris Alonso, otru puñal.
Cuando paecía que meyor taba l’Urraca, engabitaba Álvaro Ponte un balón que se colaba cruciáu na portería d’Iván. Adelantrábase con xusticia’l Ciares, pero quedaba más de media hora per delantre. Entraba Bryan por Chery. Y a les primeres de cambiu, llevantaba al públicu de los sos asientos. Díbase d’unu, y de siguíu del segundu con una ruleta. Fuerza la falta. La xente nel fondu mírase con un amiestu ente incredulidá ya ilusión.
Poco dempués, tres córner visitante, arrinca en velocidá, y Pablo Díaz namás lu puede parar en falta. Segunda mariella pal central, que pa cuelmu de males mancábase na entrada. Quedaben daqué más de 15 minutos y el Ciares con un home más. Poníense clares les coses.
Sicasí, con 10 foi cuando más lo intentó l’equipu llaniscu. Con más corazón que cabeza, y con más balones a la área que fútbol, probaron fortuna. Entró Rigo por un ovacionau Ponte. Prendes asitiábase por delantre de la defensa, dando tou un recital. La forma d’intentalo del Urraca ye la que más beneficiaba al Ciares. Dos disparos de Javi Toyos foi’l bagaxe ofensivu del Urraca nestos últimos minutos, que dio la cara magar la inferioridá numbérica.
Tres puntos qu’averen al equipu al oxetivu del pase a semifinales. Agora 7 díes per delantre pa preparar la visita a Pravia. Antes, amistosos en Valdesoto y La Bañeza la fin de selmana. Piano piano si arriva lontano.