[Ciares 1-0 Urraca] L’Urraca nun esnala

Partíu seriu del Ciares en La Cruz y victoria frente a un Urraca en probemes serios. Marcos Iglesias realcontróse col gol y firmó’l triunfu teyeru.

Tres de los importantes 3 puntos conseguíos la selmana pasada nel campu del Condal, tocaba refrendalos frente al Urraca, farolín roxu de la tercera asturiana.

L’Urraca nun ta fechu como pa los puestos ba,os de la tabla, más bien al revés, ye un equipu fechu a golpe de talonariu. Munchu xugador con caché en tercera. Sin duda a los de Posada no se-yos pasó pela cabeza que diben tar, yá nin tan siquiera, ba segunda metá de la tabla. Güei mesmu diríen derechos a repetir descensu por segundu añu consecutivu. La temporada pasada salvólos de la quema una carambola.

Dos atracciones especiales pa los aficionaos del Ciares. Per un llau Adrián San Eloy, que llevó les riendes del equipu na primer temporada de Nacho Cabo nel banquín. Per otru llau Borja Argüelles, un de los xugadores más queridos d’aquella época pola grada y el vestuariu, y home fundamental na clasificación pa’l play off d’ascensu.

La primer parte nun va pasar a la historia del fútbol. Quiso salir mandón l’Urraca, pero nin 10 minutos-yos duró’l puxu. L’alcuentru quedó ensin timón, con mui pocu xuegu. L’estáu del verde, mui blandu, tampoco ayuda al espectáculu.

L’únicu que consiguió sacar un poco de la monotonía al partíu foi Cris, que culminaba una gran xugada con un centru precisu que remachaba a gol Marcos de cabeza. Corría’l minutu 40 y el partíu poníase de cara pa los de Tino. Con esi marcador diríen al descansu.

El técnicu xixonés solucionó’l problema de la mancadura de Juan Carlos cola entrada nel pivote doble d’Iván Suárez. Pablo Martínez, dempués de munches xornaes fuera del once, volvía a la so posición natural, la media punta, a dar sentíu al xuegu y a combinar ente llínies.

La segunda parte resultó muncho más divertida pal espectador. L’Urraca quiso mandar, anque se-y echa en falta esa mordiente que necesiten los equipos d’abaxo. Muncha calidá, pero nun se conoz en prau.
Más ocasiones pa quien menos se xugaba. El Ciares tuvo munches pa sentenciar l’alcuentru. L’Urraca tuvo que se conformar con qu’un disparu violentu llonxanu que diba al llargueru, o otru disparu cuando agonizaba l’alcuentru que refugaba bien Nacho abaxo.

Pela parte del Ciares munches y mui clares. Na primera, escapaba solu Marcos Iglesias, pero la so definición col esterior salía-y un tanto centrada y atrapaba Dani Laviana.

Javi Gutiérrez, como siempres, creó complicaciones a la zaga cola so potencia y descaru. Dani Laviana salvaba milagrosamente un remate suyu al palu curtiu a bocaxarru. Dani Peláez tamién tuvo la suya, nuna falta situada en posición idónea pa él. El disparu superaba la barrera pero diba fuera per poco.

Otra pa Marcos Iglesias, que remataba en carrera pero-y salía centrao y refugaba Dani Laviana. Otra gran internada de Javi tamién con centru, pero que nun atopaba rematador.

La más clara pa Pablo Martínez. Otra gran xugada de Javi pela banda izquierda, balón pa Pablo na frontal del área pequeña, controla, y con too a favor dispara arriba.

Nun hebo tiempu pa más. Victoria xusta, a tenor de lo asocedíu na segunda parte. El Ciares puede tomase un respiru clasificatoriu al aventayar al Llanera en 8 puntos, primer equipu fuera de los puestos que dan accesu a la Copa Federación. El domingu enfréntense dos equipos col mesmu oxetivu. El Colunga, novenu, a un solu puntu de los de Tino, recibe al Ciares. Partíu de los que valen más de tres puntos.