[Ciares 1-1 Avilés B] Como Bill Murray nel “Groundhog Day”
El Ciares faise acreedor a la victoria, pero la so falta d’aciertu condérga-y a un nuevu empate. Yá son 17 les xornaes ensin conocer la derrota.
Esti domingu nun yera un día cualesquier pal Ciares. Volvía a La Cruz l’entrenador que dirixía al equipu nos dos últimes temporaes, llevando al conxuntu a xugar el play off d’ascensu a Segunda División B per primer vegada na so hestoria.
Ciares 1 – 1 Avilés B
Ciares: Kike; Fonso, Lozano, Beni, Aitor; Prendes, Juan Carlos; Piñera, Jorge Vázquez (Jimmy 57′), Cris (Polo 46′) y Ponte (Bryan 69′)
Avilés B: Rivas; Pelayo, Borja Granda, Efrén, Mikel, Portu, Álvaro, Guille, Mario (Adrián 90′), Aser (Omar 83′) y Eric (César 73′)
Goles:
0-1: Eric 34′
1-1: Juan Carlos 64′
Árbitru: Romero García. Expulsó pol Avilés B a Pelayo y amonestó a Portu y a Nacho Cabo.
Incidencies: Alcuentru correspondiente a la décimo séptima jxornada de la Tercer División Asturiana disputáu en La Cruz ante unos 350 espectadores nel Día del Acompañante decretáu por la directiva local. El terren de xuegu notó col pasu los minutos la agua de mientres la selmana.
Pero futbolísticamente sí foi un domingu cualesquier. De nuevu’l Ciares foi meyor, de nuevu embrivió al so rival, que por momentos paecía un rival menor, xeneró ocasiones, fízose acreedor a la victoria, pero tiense que conformar col empate. Como-y pasaba a Bill Murray, esta crónica empieza a resultar repetitiva.
Arrincaba meyor el Ciares, como en 75 de los 90 minutos. El verde taba lentu, pero nun torgaba que pudiera xugase el balón. Asina Juan Carlos llucíase, llevando’l pesu d’alcuentru, y metiendo los pases ente llínees que l’equipu precisaba.
El primeru n’esmoler yera Jorge Vázquez. Balón de banda de Prendes, el porteru con ganes de salir, sale a por uves y el refugue cai-y al mediocentro xixonés, pero dispara enriba. Tendría otra, pero’l so remate de cabeza tampoco yera gol.
Ponte tamién tuvo les suyes, pero primeru salvaba Rivas, y na segunda’l so remate diba llambiéndo’l poste.
Llegábase al descansu cola sensación de que l’empate yera curtiu pal Ciares, pero Eric disparaba dende fora de la área, el balón rebotaba en Beni, y descolocaba a un inéditu Kike.
Que naide se pregunte’l porqué, pero’l Ciares diba perdiendo al descansu.
De primeres de la segunda parte, paecía que’l gol ficiera dañu. Coincidió colos peores minutos del Ciares, incapaz de llevar pelligru a la meta del filial avilesín.
Cuando se superaba’l cuartu d’hora d’esta segunda metá, Juan Carlos rompía la tónica del alcuentru con un llanzamientu de falta que superaba a Rivas y asitiaba un inxustu, pero siquier más correctu, empate.
A partir d’ende, monólogu teyeru. El primeru foi Polo, al recibir un pase de primeres de Jimmy ya intentar asitiar el balón al palu llargu col esterior, pero’l porteru visitante realizaba la parada del partíu.
Quedaba un mundiu per delantre, y el Ciares yera meyor. Más ocasiones clares, el balón cutía en Ponte cuando se cantaba gol.
Averábase’l final. Nuevu unu pa unu de Polo, pero’l so disparu vase esviáu. Raspiaba’l surrealismu, el balón nun quería entrar. El fútbol ye inxustu. Al filial valía-y l’empate. Retrasaba los saques, mancábense en cada contautu. Averábense les 14:30, increíble.
Minutu 90. Espulsión de Pelayo y amonestación a Nacho Cabo. Amorrenta’l partíu. Va morrer ende. Ponla Juan Carlos, llega Prendes solu al segundu palu, llánzase en plancha, pero vase fora.
Y el árbitru da trés pitíos.