[Ciares 2-1 Ḷḷuarca] Primer vuelta pa la hestoria
Victoria afecha ante un seriu Ḷḷuarca. Rubén Montequín marcó’l primeru tres una chilena al palu de Pichón. L’ex del Ḷḷuarca robló un gran partíu y sentenció al so exequipo faciendo’l segundu. Na segunda parte los visitantes apertaron más pero nun llograron xenerar peligru.
Coles baxes de Jimmy, Pelayo Torre y Rigo, el Ciares volvía demostrar el so poderosu fondu d’armariu. Nacho Cabo apostaba pol polivalente Juan Carlos en banda esquierda, dando la manija del equipu a Pablo Martínez y Meana. Tres unos minutos de tantéu nos que los locales trataben de faese col balón, hubo que esperar un cuartu d’hora pa la primer ocasión. Recibe Pablo Martínez en campu ḷḷuarqués, balón en fondura al desmarque de Borja Argüelles, retayu alte el defensa pa quedar mano a mano ante Aitor, y el porteru salva’l primeru. El conxuntu teyero empezaba a faese col partíu.
Ciares 2 – 1 Ḷḷuarca
Ciares: Kike, Fonso, Lozano, Borja Noval, Óscar Ruiz, Pablo Martínez, Juan Carlos, Meana (Aitor 90′), Pichón (Fran 80′), Borja Argüelles y Rubo (Ponte 69′)
Ḷḷuarca: Aitor, Sagrado, Labriego, Iván, Torres (Carlos Suárez 80′), Víctor, Pelayo (Efrén 80′), Elián, Carlos Manuel, Orly y Mario (Adri 66′)
Goles:
1-0: Rubo 26′
1-1: Mario 36′
2-1: Pichón 44′
Árbitru: González Suárez. Amonestó pol Ciares a Meana y pol el Ḷḷuarca a Sariego.
Incidencies: Encuentru correspondiente a la décimo novena xornada de la Tercer División Asturiana disputau en La Cruz ante cuatrocientos espectadores. Terren de xuegu blandu poles lluvies caídes durante la selmana.
Poco dempués Fonso Bellón saca de banda dende l’estremu derechu, salta Juan Carlos y el bote cai a Pichón, quien de llombu a la portería engabita una sensacional chilena que s’estrella nel segundu palu; Rubén Montequín, bien sollerte, adelantrase a la zaga visitante y emburria el refugue a la rede. Gol de nueve nato tres el xenial remate de Pichón, qu’empezaba a faer sufrir a los sos ex. Nel ’28 llibre directu na frontera del Ḷḷuarca, Pablo Martínez llanza cola so habitual calidá, el balón vuela percima de la barrera y va a la cepa del poste, pero Aitor espurrise bien y llogra esviar. Nel ’35 balón perdíu del Ceares en mediocampo, el Ḷḷuarca monta la contra con un balón llargu al desmarque de Mario, el delanteru dispara cruciáu dende’l vértiz derechu de la área, y Kike nun puede faer nada. Empate a un gol cuando meyor taben los locales. Al filu del descansu, nel ’44, nuevu pase en fondura de Pablo Martínez, Pichón recibe dientro de la área y suelta un disparu cruciáu a la media vuelta que supera a Aitor pol palu llargu y fai alloriar a la grada. Descansu col 2-1.
Na segunda parte’l Ceares salió a acompangar el partíu ente que’l Ḷḷuarca daba un pasu alantre obligáu pola resultancia. Anque los visitantes intentaronlo, nun xeneraben peligru. Los teyeros pela so parte dexaben pasar el tiempu y trataben de montar dalgún contraataque con escasu ésitu. Segunda metá ensin ocasiones, llegándose a la fin del partíu ensin respigos. 2-1 y tres punto d’oru pa una Unión Club Ceares que ruempe tolos récords de los sos 67 años d’hestoria. Primer vuelta pa l’alcordanza que los mozos de Nacho Cabo trataren de repitir a partir del 4 de Xineru. Rematamos esti primer tramu ligueru nel 3er puestu, a 2 del líder, un solu puntu percima del 5º, y 25 puntos percima del descensu.
Próximu partíu BOXING DAY: Sábadu 4 a les 15:45 en La Cruz, U.C. Ceares – Urraca C.F.