[Ciares 2-1 Lenense] Brazalete de capitán

Esti domingu yera’l día pa Jimmy, el capitán del Ciares. Llevaba tola temporada buscando’l gol, y llegó nel día más esperáu, nel partíu más importante de la hestoria del club xixonés.

Salíen los teyeros con cambéu de sistema. Borja Argüelles ocupaba la plaza de Ponte como delanteru, y Pablo Martínez volvía a l’alliniación asitiándose como interior diestru. Empiezu apolmonante de los brickers, llanzando dos córners apenes empezaren l’alcuentru. El gol llegó nel minutu catorce. Juan Carlos mete en fondura pa Borja Argüelles, vase pola esquierda, intérnase na área, y el so pase de la muerte remáchalu Pablo Martínez a la portería. Pablo Sánchez dio l’únicu plasmu de la primer parte. Trallazu dende fora de la área que toca Pablo y vase al llargueru. A partir d’ende’l dominiu foi local. Primero remató Juan Carlos embaxo una nueva xugada de Borja per banda esquierda, salvó’l porteru. El mesmu Borja tuvo una mano, de nuevu Víctor, espectacular güei, salvaba. La postrera teníala Borja Noval nun remate que coló altu tres llanzamientu de córner de Pablo Martínez. Al descansu tou diba bien. El Cuadonga empataba y nós ganábamos, dábense tolos condicionantes. Namás empezar la segunda parte, Pelayo Torre tuvo la sentencia, pero’l so disparu estenábalu Víctor. Al cuartu d’hora llegaba’l mazazu. Primero enterábamonos del gol del Cuadonga nel minutu noventa y tres. Darréu, Álex Hornás marcaba na única ocasión de los visitantes na segunda parte. Tocaba remar. Ponte incorporábase a la delantrera. Y Borja Argüelles monopolizaba les ocasiones na segunda parte. Dos manos a manos que paraba Víctor de nuevu. El segundu tres un increíble control dientro de la área. Ponte tenía tamién la suya, pero’l so remate cola maniega foise enriba. Pasaben los minutos pero nun acababa de llegar el gol. Les ocasiones asocedíen con escasa suerte. Y averábase el final. Xugada de Borja Argüelles dende banda derecha, dexábala a Pelayo Torre, que abre pa Óscar Ruíz. Esti poníala por embaxo y ¿quién si non? Jimmy remacha. D’ende a la fin intentu de vaselina de Borja Argüelles, mientres se transitaba tranquilamente al noventa. El Ciares cumplió. Fáltanos un puntu. Vamos consiguilu’l próximu domingu. Que nun falte naide.