[Ciares 2-1 Mosconia] L’equipu de los noventa
Nueva victoria del Ciares de Miguelín nel últimu sollutu que lu asitia colos meyores de la lliga y mételu de llenu na llucha pol play-off.
Los neños yeren los protagonistes nel mañaneru dominical. Presente y futuru del club facíen la foto antes del partíu. Güei xugaben los grandes, pero toos taben ende.
Paecía que diba empezar meyor el Mosconia. Equipu recién xubíu pero de gran tradición nel fútbol asturianu, que salea plácidamente pola metá de la tabla, ensin nengún tipu d’aforfugu. Hasta trés córners consecutivos sacaben los moscones, ensin ésitu.
Ciares 2 – 1 Mosconia
Ciares: Davo; Rigo, Lozano, Beni, Aitor; Jorge Vázquez (Prendes 43′), Juan Carlos; Bryan, Jimmy, Cris (Ponte 63′) y Polo
Mosconia: Vilches; Moisés, Secades (Bertín 70′), Diego, Cordero, Borja, Peláez, Rubén (Israel 28′), Wiski, Yoni y Román
Goles: 1-0: Juan Carlos 12′
1-1: Wiski 25′
2-1: Aitor 90′
Árbitru: Alonso de la Lama (Uviéu). Amonestó pol Ciares a Jorge Vázquez y Bryan y pol Mosconia a Borja y Cordero
Incidencias: Alcuentru correspondiente a la décimo novena xornada de la Tercer División Asturiana xugau en La Cruz. Xornada del Boxing Day teyeru y quinientos cincuenta espectadores nel campu. Terren de xuegu bien.
Sicasí tou camudaba cuando namás se llevaben xugaos doce minutos. Cris Alonso recibía un golpe dientro de la área y l’árbitru decretaba’l claru penalti. Juan Carlos con muncha clase buscaba la escuadra, el balón pegaba nel llargueru y botaba mediu metro dientro de la portería. Partíu de cara.
Fueron los meyores minutos del Ciares, con Jimmy buscando’l balón y xugando ente llínees. Cris y Bryan como puñales, cambeos de xuegu, centros. N’unu a puntu tuvo Jimmy de marcar el segundu, cabeció picáu un balón de Juan Carlos, pero atrapaba Vilches.
Como sueli ser habitual nel Ciares d’esta temporada, nel so meyor momentu llegaba’l gol rival. Wiski engabitaba un terrible chut dende fora de la área, que se colaba pela escuadra derecha de la meta defendida por Davo.
La segunda parte siguía col dominiu local, pero menos ocasiones. Juan Carlos buscaba’l gol de falta. Disparu pembaxo al palu llargu pero vase fora de forma milagrosa pa un Vilches que namás la podía siguir cola mirada.
Dos saques de puerta perfectos de Davo asitiaben a Polo en posición de remate al midise en velocidá a un Corderu que yá traía tarxeta de la primer parte. Na primera, buscaba’l centru cuando paecía meyor asitiáu pa disparar, pero Jimmy nun llegaba. Na segunda, retayu y disparu cola maniega qu’atrapaba Vilches en tocando nun defensa.
Pasaben los minutos y nun llegaba’l gol. Intentábalo de llibre indirectu Aitor Cañedo, pero’l so disparu diba a córner. Beni teníala tamién tres un saque d’esquina, españaba’l balón cola so pierna mala, y díbase raspiando’l llargueru.
De nuevu Polo vía como’l so gol nun xubía al marcador, al rematar de cabeza a espetaperru. Paecía qu’esa diba ser la postrera.
Pero quedaba otra. Falta en posición pa Juan Carlos. Percima de la barrera, refuga Vilches pero Aitor Cañedo llanzábase en plancha pa poner al Ciares colos meyores.
Un solu partíu perdíu de 19 xugaos. Enforma empates pero yá tán llegando les victories. El Ciares yá cueye a los de riba.
El Ciares yá ta equí.