[Ciares 2-2 Lenense] El Ḷḷenense saca petróleo
Un gol postreru de falta directa permite-y al L.lenense llevar un puntu nun partíu onde sólo foi meyor cuando’l Ciares decidió que lo fuera.
Davo yá yera’l protagonista enantes del alcuentru, al recuperar munches xornaes dempués la titularidá frente a Nacho. Sicasí, finalmente centró tola atención, polo yá comentao, pol so partidazu y por tener que retirase mancáu.
El protagonismu visitante por Teto, ex-xugador ciarista mui queríu. Cuando comenzaba l’alcuentru, too facía prever una victoria llocal cómoda. Los teyeros salieron en tromba y el L.lenense nun entrada en partíu.
Sólo 7 minutos cuando un Marcos Iglesias maxistral dexaba de tacón el balón pa Cayarga, que nel mano a mano definía y subía’l primeru.
Ciares 2 – 2 L.lenense
Ciares: Davo (Nacho 37′); Miguel Obaya, Fonso, Beni, Chery, Juan Carlos, Dani Peláez, Cris, Pablo Martínez (Natan 87′), Cayarga, Marcos Iglesias (Javi Gutiérrez 63′)
L.lenense: Jano; Brian, Connor, Fuertes, Abascal, Fredo (Kike Moreno 75′), Amine (Joan 89′), Teto, Casado (Tranche 66′), Pablo Sánchez, Madeira
Goles:
1-0: Cayarga 7′
1-1: Brian 24′
2-1: Marcos Iglesias 47′
2-2: Madeira 82′
Árbitru: Díaz Fonseca, del Colexu del Nalón. Amonestó a Cris pol Ciares y a Teto pol L.lenense. Espulsó a Tino del Corzo, técnicu llocal, nel minutu 88.
Incidencies: 300 espectadores nel Campu La Cruz. Terrenu de xuegu en buenes condiciones. Guardóse un minutu de silenciu por Rubén Álvarez Morán, hermanu del utilleru llocal Fernando, y por Florentino Sierra, sociu llocal.
Poco dempués, presentábase otra vez Cayarga frente al porteru. Paecía que’l defensa lu valtaba, pero’l colexáu decretaba continuar ensin señalar la pena máxima.
Cuando peor lo tenía’l L.lenense, cambió l’alcuentru. Un error de Davo, subsanábalu posteriormente con un paradón. Y los visitantes ficiéronse col mandu y llevaron peligru constante.
Ehí emerxó la figura del cancerberu llocal, que supo atayar toles aprosimaciones visitantes, per baxo y per alto, de lloñe y a espetaperru. La única qu’atravesó la llínia foi con trampa, nun disparu dende lloñe, mui duro, pero rebotaba nun xugador visitante y cambiaba de dirección. Davo llegó a tocala, pero nun foi quien pa evitar que subiera’l gol del empate.
Y dempués llegaría la so llesión pasada la media hora, paez que problemes d’abductor. Dexaba’l sitio a Nacho, que tenía qu’entrar al verde ensin calentar en metá del dominiu visitante.
Tres del descansu cambiaba’l panorama de nuevu. Apenes comenzaba, falta llateral colgada por Dani Peláez, ponla Beni al otru poste y arremacha Marcos.
Munchos minutos ensin crear peligro los visitantes, metíos mui abaxo na tabla, y ensin muncha pinta de sumar en La Cruz.
Casi ensin ocasiones del L.lenense na segunda metá entrábemos nos últimos 15 minutos de xuegu. Una falta llateral golpiada por Madeira llimpiaba la escuadra de telarañes.
Al final l’empate nun paez inxustu, anque da la impresión de que’l Ciares xugó col frenu echáu munchos minutos. El domingu toca rendir visita al Llanera, recién ascendíu que comparte oxetivu colos de Tino, anque’l so proyectu paez mui ambiciosu. Desvelaráse nunos meses.