Ciares – Urraca: día de los neños

Empieza 2014 nel Campu de la Cruz, y empieza de la meyor manera posible, cola segunda edición del Boxing Day. Un día señaláu dientro del calendariu teyeru, onde los neños y la familia son los protagonistes. Espérase una gran entrada mañana, como preámbulu a la llegada de los Reis Magos al Puertu Deportivu’l domingu.

El Ciares empieza la segunda vuelta tres una espectacular primer, con númberos de play-off, y batiendo tolos rexistros en puntos. Caltener el nivel nun va ser fácil, pero esti equipu yá demostró que sabe y puede competir colos equipos más fuertes de la categoría.

Enfrente va tener al Urraca. L’equipu llaniscu taba presente en prácticamente toles quinieles pa xugar la Copa Federación la próxima temporada. Sigue na so mano, lo apertao de la clasificación na zona media abre l’abanicu a dellos equipos. Dende’l Tiuya que ye novenu, hasta l’Uviéu B que ye decimoquintu, toes les escuadres engarren a comuña. Siete equipo en 2 puntos, la lliga 2013/2014 ta resultando un espectáculu. L’Urraca ocupa anguaño la decimotercer posición, con 24 puntos.

El partíu d’ida acabó n’empate, 1-1, pero cualquier equipu pudo salir ganador. Un alcuentru per prestosu, onde inclusive Borja Argüelles acabó como llateral derechu buscando’l conxuntu bricker l’empate. El conxuntu local nun sabe lo qué ye perder esta temporada na Cruz, y el visitante namá saborguió los mieles del trunfu a casa nuna ocasión esta temporada. Partíu pues con pronósticu local, pero la gran plantiya de l’Urraca convida a la prudencia.

A pesar de la baxa de Gusi, ente otros, l’equipu visitante consiguió reforzase con xugadores d’inclusive más caláu, como José Luis, xugador procedente del Caudal, o Arroyabe, que realizó una gran temporada’l pasáu cursu nel Ḷḷuarca.

Esperamos que les families cearistas, y toles que quieran asistir, esfruten d’un gran partíu. El 2014 bricker acaba d’empezar.