El Ciares sorpriende’l Covadonga
Nueva victoria, esta vegada n’unu de los campos más duros de la categoría, pa roblar unu de los meyores empiezos ligueros de toa nuesa hestoria.
Como cada partíu viaxamos a La Corredoria creyendo en que la victoria ye posible, sicasí visitar al CD Covadonga siempres infunde respetu; visitábamos nada menos que al 3er clasificáu de l’anterior campaña.
El partíu empezó con toa una declaración d’intenciones: saque de centru del campu ya inmediata incorporación al ataque, con Pelayo Torre comandando la xugada, y tres una serie de combinaciones ye’l mesmu estremu’l que dispara esviáu. Nestos primeros minutos les llegaes ciaristas fueron constantes, anque con poca pegada. El Covadonga espurríase y empezaba a llegar, pasáu’l cuartu d’hora un David bien activu disparaba pero Kike evitaba’l gol.
Nel minutu 27 Piero falla al estenar una falta ciarista, la so peñada estrelose nel palu, y Jimmy, bien sollerte, fízose col refugue pero nun foi capaz de superar a Gabri.
En cantu del descansu, nel ‘43, Juan Carlos roba un balón en campu propio, conduz hasta’l círculu central, y mete un balón llargu pa la carrera de Ponte, Gabri sale y llega antes al balón pero’l so estene estréllase nel delanteru y el rebote entra na portería. Xugada de fortuna pero tamién de fe. Descansu nel J.A.A. Rabanal, repitíase la hestoria: 0-1.
La segunda parte empezó col CD Covadonga entornáu, decidíu a remontar el partíu. Nos primeros minutos los locales realizaron 3 disparos dende la frontera de la área que se fueron cerca de la portería. L’afición ciarista apertaba dende la grada viendo qu’el Cova taba nel so meyor momentu y teníanos zarraos. Sicasí, llueu reaccionamos: galopiada de Ponte al contraataque, pierde’l balón ante Colo pero sigue lluchándola hasta que la arrampuña de nuevu, y yá dientro de la área da’l pase de la muerte pa Pelayo Torre que nun llega por centímetros. Na siguiente xugada repítese la situación: nuevu contraataque qu’agora lleva Pelayo Torre, y de nuevu al dar el pase tras esta vegada ye’l porteru Gabri el qu’evita’l remate.
A l’hora de xuegu nueva xugada a la contra trenzada dende tras, Pichón que ve perbién la incorporación de Fonsi rompiendo’l fora de xuegu, el llateral qu’aguanta dientro de la área, y en cuanto ve buecu crucia’l balón pa llograr el 0-2. Tres el gol, Nacho Cabo da entrada a Rigo en sustitución de Ponte, pasando Aitor a la posición de pivote y Jimmy como referente en punta. Poco duraría’l capitán nesa posición, y ye que nel ’65 una entrada sobre Piero y la posterior cayida acaben costar la tarxeta colorada nuna situación de lo más confusa. Pol xestu del árbitru pudo haber una pisotada. El Cuadonga aprovechó esos momentos de tracamundiu. Nuevu contraataque ciarista, Pelayo Torre enche a un rival y ye baltáu claramente, pero l’árbitru da llei de la ventaya porque’l balón cai-y a Borja Argüelles, quien al trate arrodiáu de contrarios pierde’l balón, y el contraataque del Cova acaba en gol de David. Protestes ciaristas ante la situación que se salden con una tarxeta mariella p’Aitor. Con 10 xugadores, un gol de ventaya y 20 minutos per delantre, la mañana paecía complicase. Pero nun foi asina: estene de la zaga ciarista escontra campu azul, Pichón prime y Negredo falla nel estene, el xixonés que se fai col balón nel centru del campu, en cara a Colo que yera’l postreru defensor, énche-y con una bicicleta, y define cola piquera ante la salida de Gabri. Gol de clase y puxu a partes iguales que lleva la llocura a la grada ciarista.
D’ende a la fin l’equipu local buscó balones llargos, pero repitiendo lo vivío en La Cruz ante’l Llangréu, cada balón colgáu sobre la área ciarista yera desabaratado por Kike, Lozano o Aitor, esta vegada cola ayuda de Rigo, ente que Pichón, Juan Carlos, o’l acabante incorporar Meana trataben d’aguantar el balón hasta que l’árbitru pitó’l final col 1-3 nel marcador.
Como yá asocediera la temporada pasada, 3 puntos nel difícil campu del Rabanal, que nos ponen ante l’entamu de la temporada suañada yá que asitiamos en 4ª posición con 8 puntos.
El próximu alcuentru va ser el Domingu 22 a les 17:30 en La Cruz ante l’Atlético de Lugones, segundu clasificáu.