El Real Avilés gana’l III Troféu ‘Pepe Ortiz’ (1-2)
El Sábadu yera un día marcáu nel calendariu pa los aficionaos ciaristas; dos meses dempués del postreru partíu del equipu, a les 19:30 volvía rodar el balón en La Cruz. Visitábanos el Real Avilés, equipu de Segunda B, nel homenaxe añal que-y facemos a Pepe Ortiz, el meyor xugador de la hestoria del nuesu barriu.
El partíu empezó con una amuesa de respetu: los 300 espectadores que taben en La Cruz guardaron un minutu de silenciu pola traxedia vivida en Galicia y pol fallecimientu del exfutbolista Javier Vega. El Real Avilés, dirixíu pol ex-xugador del Ceares, Josu Uribe, salió col so once de gala y namas entamar tomó les riendes del alcuentru. La primer alliniación de la Unión Club Ceares foi: Kike, Jorge, Fonsi, Rigo, Óscar, Juan Carlos, Pichón, Borja Argüelles, Galache, Fran y Ponte.
El Ceares trató de sacar el balón xugáu, amosando l’estilu que Nacho Cabo lleva tresmitiendo al equipu dende la so llegada, pero la presión avilesina enzancaba llegar al ataque. Tres dellos aproximamientos entrando peles bandes, nel minutu 28 un balón llargu de Gonzalo aprovechávalu Matías pa sirvir a Geni’l 0-1. Apenes dos minutos dempués la escena repitíase, y yera Gerardo quien asistía a Geni que marcaba’l 0-2. El Ceares intentaba estragar la defensa avilesina cola velocidá de Fran pero les llegaes fueron escases ante la fortaleza defensiva visitante. L’afición reclamó un penalty sobre Borja Argüelles, quien tamién tuvo bien activu.
Na segunda metá hubo carrusel de cambeos en dambos equipos. L’once ciarista quedó asina: Pablo, Borja Argüelles, Fonsi, Rigo, Óscar Ruíz, Meana, Pablo Martínez, Pelayo Torre, Jimmy, Rubo y Turu. El Ceares siguió tratando de xugar el balón, Pelayo Torre dio-y frescura al ataque y acompañáu d’Óscar afondó pela banda esquierda. Nel minutu 60, Hevia, xugador del filial, entró sustituyendo a Borja Argüelles qu’ocupó’l llateral derechu mientres los primeros minutos de la segunda metá. Finalmente, nel minutu 87, Piquero cometía penalty sobre Rubo nuna de les sos internaes na área, y Pelayo Torre dexo’l marcador en 1-2.
Asina, el Real Avilés llevose’l III Troféu ‘Pepe Ortiz’ ante un Ceares que dexó una bona imaxe tres solo cuatro entrenamientos. Estimamos enforma al Real Avilés qu’aceutó la nuesa invitación ya apostó por esti troféu y deseyámos-yos suerte pa la so temporada en Segunda B. Asina mesmu, destacamos la gran entrada vivida, unos 300 aficionaos, demostrando qu’el ciarismo tien una salú envidiable. Pero si nos quedemos con una imaxe d’ayeri, ye ensin dulda cola emoción de ver a los familiares de Pepe Ortiz estimando l’homenaxe ente llárimes; el fútbol ye sentimientu y pasión. L’añu que vien repitimos.