[Lenense 2-4 Ciares] El Ciares tira de carácter

El Ciares da la vuelta a un partíu que se-y pusiera cuesta arriba, al ver como’l Lenense se adelantaba nel marcador.

Paez una constante esta temporada, la primer aproximación que recibe’l Ciares termina en gol. Pasó l’últimu partíu, col Colunga, que sólo pisó una vez l’área defendía por Davo na segunda parte y valió-yos pa llevar la victoria. Y de nuevu ayeri, frente al Lenense, dos ocasiones y dos goles. Y eso que’l partíu púsose mui pronto de cara. A los 7 minutos gran apertura a banda de Pablo Martínez pa Marcos Iglesias. Centra esti per baxo, y el rechace cae-y a Jorge Cayarga. Con muncha tranquilidá controla y bate per alto al porteru llocal.

Poques novedaes nel Ciares. Sólo Natan yera titular nel extremu diestru, sustituyendo a Cris. El restu, los mesmos que nel últimu alcuentro de lliga.

El partíu tenía pinta de placenteru pa los de Tino, que yeren dueños del balón y del alcuentru. El Lenense nun paeía crear peligru n’ataque, y veíase más cerca la sentencia visitante que l’empate. A puntu tuvo Marcos en dos ocasiones de dexar el partíu llistu pa sentencia. Na primera, trataba de rematar nel primer palu un serviciu unviáu dende la banda izquierda, pero nun podía finalizar.

Na segunda, gran combinación de Natan pela banda. Centra atrás y remata Marcos. Pero’l balón, que buscaba la escuadra izquierda, perdíase altu.

Pero cuando too facía presaxar que’l partíu diba ser tranquilu, dos pérdides na salida del balón llevaron al Lenense arriba. Na primer ocasión de gol, un Rícar mui sueltu al borde del área pequeña remata a bocaxarru. Sálvala Davo, pero vuelve a cae-y el rechace y sube l’empate al marcador.

La segunda parte comenzaba con falta llateral a favor del Ciares. Na contra, gran xugada, centru pefectu, y Keke remataba de cabeza adelantando a los l.lenizos. Los llocales, colo mínimu, encarrilaben el partíu.

Nel peor momentu de los teyeros surdió Chery. El llateral zurdu sigue creciendo, y dos xugaes suyes consecutives cambiaron el rumbu del alcuentru. Gran cabalgada pela banda, llevándose a dos xugadores contrarios. Pero’l centru marchanase llargu.

Na segunda, cambiu pefectu de xuegu dende la banda derecha. Chery controla con muncha habilidá’l balón, orientándolu pa pisar área. El llateral derechu Brian derribábalu claramente y veía la segunda tarxeta.

Con un Lenense mui metíu atrás, con 10 homes en prau, Tino quemó les naves. Retiraba a Miguel y daba entrada a Javi Gutierrez. Delanteru por defensa. L’equipu pasaba a defender con 3 xugadores, arrebatu n’El Sotón. El cambiu resultó providencial.

Buena xugada que terminaba con disparu de Pablo Martínez cola zurda buscando’l palu curtiu. Diba fuera por poco.
La combinación Dani Peláez con Marcos Iglesias sigue dando frutos. Segunda vegada esta temporada que la pon Dani dende la banda derecha, zarradina, y peina Marcos. Empate.

A 10 minutos del final, de nuevu Marcos casi lleva a los más de 100 cearistes presentes nel campu a un infartu masivu, cuando emburriaba dende l’área pequeña un centru perfectu servíu por Javi Gutiérrez, pero salvaba increíblemente’l porteru llocal.

Nun ye Marcos de los que perdona dos veces. Con un disparu duru, abaxu, cruzáu, llevantaba’l partíu.

Yá nel descuentu, plántase Natan ente’l porteru, dríblalu contra pa fuera y ye derribáu. El propiu Natan s’encargaba del llanzamientu, pero adivinaba’l cancerberu llocal. Guille Barquero, que xugaba en casa, emburriaba a gol y mataba’l partíu.

El próximo domingu toca recibir al Llanera. Partíu importante frente al colista. El Ciares, con 9 puntos, sitúase na metá de la tabla. Una victoria meteríalos na parte mediu-alta. Con 3 victories nos últimos 4 partíos, l’equipu va alcontrando’ so puntu. A siguir.