[L’Entregu 0-0 Ciares] A ceru puru
Nuevu empate a cero pa los de Tino, que sumen 4 alcuentros consecutivos ensin encaxar tantos. Partíu poco vistosu nel Nalón Nuevu.
Quintu partíu del Ciares ensin perder, y cuartu ensin encaxar goles. Dende l’alcuentru disputáu frente al llíder, el Real Avilés, nel Suárez Puerta, los de Tino nun saben lo que ye perder. L’alcuentru na Villa del Adelantáu finalizó con victoria pela mínima pa los de Pablo Lago. Dende aquella, Uviéu B y Llanes cayíen en La Cruz, el Sporting B sólo podía llevar un puntu del feudu ciarista, y arrancaba puntos nes visites al Nalón Nuevu y al Rabanal.
L’Entregu 0 – 0 Ciares
L’Entregu: Rabanillo; Álex García, Guillermo, Guille Díaz, Samuel, Gabancho, Meana (Martín 75′), Trelles (Noe 79′), Riki, Raúl (Omar 60′) y Damián
Ciares: Nacho; Natan, Fonso, Beni, Chery, Iván (Juan Carlos 79′), Dani Peláez, Cris (Pablo Martínez 89′), Cayarga (Javi Gutiérrez 67′), Guille y Marcos.
Árbitru: Valdés Díaz (Uviéu). Amonestó por L’Entregu a Trelles, Guille Díaz y Gabancho y pol Ciares a Natan, Guille, Cris y Chery.
Incidencies: Alcuentru correspondiente a la vixésimu primer xornada de Tercera División apostáu nel Campu Nalón Nuevu ente unos doscientos espectadores, con presencia bayurosa de siguidores del Ciares. Prau sintéticu en mal estáu.
Y too ello, en vísperes d’enfrentase a los dos equipos que tan lluchando pola cuarta plaza, el Tiuya y el Marinu, que s’enfrenten esta xornada en Miramar. Choques que pueden dilucidar por qué oxetivu va lluchar el Ciares durante’l final del cursu.
La vuelta de Dani Peláez, dempués de cumplir sanción la selmana pasada, xunida a la llesión d’Hugo modificaba la medular. Amás, Guille volvía al estremu zurdu, relegando a Javi Gutiérrez al bancu, y desplazando a Cayarga a la media punta.
Enfrente, un L’Entregu en caída llibre. Dempués d’un gran comienzu, compartiendo llideralgu na xornada 3 con 9 puntos, 8 xornaes consecutives ensin conocer la victoria llévenlu a la parte media baxa de la tabla. De fechu, los de Tino meten-y 11 puntos de ventaxa, y asómense peligrosamente a la zona de peligru.
L’alcuentru confirmó tendencies. L’Entregu quiso pero nun pudo, y el Ciares confirma que ye un de los equipos más en racha y más duros de la Tercera, ensin conceder ocasiones a un equipu llocal desesperáu.
Y ye que si nun te creen ocasiones nun te faen gol, y si nun te faen gol, sumes. Ayeri L’Entregu tuvo acercamientos, pero non ocasiones.
Les dos partes fueron simétriques, con L’Entregu dominando más, pero ensin profundidá. El Ciares mientres, buscando a Marcos, que baxaba’l balón d’espaldes a puerta pa dexar el balón de cara.
Na primera, más tibiu el dominiu, na segunda, más claru. Volcando más el xuegu pela banda izquierda, la más clara foi un centru dende ehí al segundu palu con remate de primeres que diba fuera.
Polos visitantes, tampoco muncho. Un disparu duru de Javi que raspiaba’l palu. O una gran xugada que terminaba con Chery solu en banda izquierda, pero el centru pelo baxo yera refugáu.
Al final, dambos prolonguen la so racha. La del Ciares positiva, la de L’Entregu pésima. La prósima selmana los teyeros reciben al Tiuya nun duelu importante pola zona alta. El partíu de la confirmación.